.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 134
Hüküm no: 55
Orijinal metin no: [5a-6]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Kızıltaş mahallesindeki El-Hâc Mahmud vakfının arsasının Ahmed Çelebi ve Mehmed Çelebi’ye kiraya verildiği

Vakıf arsayı binâya izin Mahmiye-i İstanbul’da Kızıltaş mahallesinde vâki‘ zikri âtî vakıf menzile hasbî mütevellî Ahmed Efendi b. Receb meclis-i şer‘de kendi tarafından asîl ve li ebeveyn karındaşı Mehmed Çelebi b. İsâ tarafından husûs-ı âti’l-beyâna sâbitü’l-vekâle vekîl olan Ahmed Çelebi mahzarında bi’t-tevliyye takrîr-i kelâm edip mahalle-i mezbûrede vâki‘ merhûm el-Hâc Mahmud [vakfının] vakıf ve süknâsı evlâdına, ba‘de’l-inkırâz ulemâdan bir recül-i sâliha şart ve ta‘yîn eylediği bir tarafı Oruc Ağa vakfına ve bir tarafı İmâm vakfına ve tarafeyni tarîk-i âm ile mahdûd vakıf menzil, bin yetmiş bir senesinde vâki‘ harîkde muhterik olup arsa-i sırfa kaldıkda cânib-i vakıfda binâya müsâ‘ade olmayıp evlâd-ı vâkıfdan mezbûrân Ahmed Çelebi ve Mehmed Çelebi arsa-i mahdûde-i mezbûreyi yevmî bir buçuk akçe ücret-i müeccele-i misli ile istîcâr ve masrûfları olan akçeyi ücret-i mezbûre ile istîfâ edince sâkin olmak için binâya tâlibler olup ve vech-i muharrer üzre îcârı cânib-i vakıfa nâfi‘ olmağla tevliyyetim hasebiyle arsa-i mezbûreyi vech-i muharrer üzre mezbûrâna îcâr ve teslîm edip mezbûr Ahmed Çelebi dahi asâleten ve vekâleten istîcâr ve tesellüm ve kabûl eyledi dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâlis aşer min şehri Ramazâni’l-mübârek sene 1073.


Şuhûdü’l-hâl: Şeyh Mehmed Efendi b. Mustafa el-İmâm, Mustafa Çelebi b. Mehmed el-Müezzin, Mustafa Ali Çelebi b. el-Müezzin, Halil Bey b. Abdullah, Mustafa Ağa subaşı sâbıkan, Ramazan Çelebi b. Ramazan, İbrahim Beşe b. Bayram Odabaşı, Oruc Ağa el-mütevellî.