.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 135
Hüküm no: 56
Orijinal metin no: [5a-7]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Otuz dokuzuncu cemâate ait vakıftan ödünç alınıp Midilli’deki çiftliklerin, bağların ve zeytin ağaçlarının rehin edildiği

İstiğlâl Cezîre-i Midilli’de vâki‘ kasaba-i Midilli ahâlîsinden olup otuz dokuz cemâ‘ate mahsûs odadan olan Hasan Ağa b. Abdullah nâm râcil meclis-i şer‘de zikr olunan odaya vakf olan akçenin bi’l-fi‘l mütevellîsi olan hâfızü’l-kitâb Hasan Efendi b. Hasan mahzarında ikrâr ve i‘tirâf edip vakf-ı mezbûrdan mütevellî-i mezbûr yedinden karz aldığım dokuz yüz altmış esedî asl-ı mâl ile târih-i kitâbdan sene-i kâmile tamâmına değin onu onbir buçuk hesâbı üzre devr-i şer‘î ile üzerime ilzâm olunan yüz kırk dört esedî guruşu ki cem‘an bin yüz dört esedî guruş mukābelesinde kasaba-i Ayazmend müzâfâtından Ahmedili nâm mahalde vâki‘ dâhiliyye üç tabaka odayı hâvî bir kule ve bir matbah ve bir anbar ve üç ahırı ve hâriciyye bir bâb evi müştemil mülk çiftlik ile mahall-i merkūmede vâki‘ [5b] etrâf-ı selâsesi Sarı Süleyman tarlası ve bir tarafı tarîk-i âm ile mahdûd üç dönüm bir kıt‘a mülk bağımı ve Akyer’de vâki‘ yüz elli dip mülk zeytin eşcârımı ve Midilli adasında vâki‘ Katritoz nâm karyede vâki‘ lede’l-ahâlî ma‘lûmu’l-hudûd hâriciyye iki evi ve bir mahzeni ve dâhiliyye üç evi ve üç mahzeni müştemil mülk çiftliğimi ve Kocadayı haremi dedikleri mahalde vâki‘ yüz dip mülk zeytin eşcârımı ve Satılmış haremi dedikleri mahalde vâki‘ yirmi dip mülk zeytin eşcârımı ve Kelemiye dedikleri mahalde vâki‘ bir tarafı benim tarlama ve bir tarafı Şeytanoğlu bahçesine ve bir tarafı tarîk-i âma ve bir tarafı ( ) nâm zimmî tarlasına müntehî dört dönüm bir kıt‘a mülk bağımı, mütevellî-i mezbûr Hasan Efendi yedine rehin vaz‘, ol dahi irtihân ve kabûl eyledikden sonra, mahallinde tesellüm ve kabzına mezbûru taslît eyledim min ba‘d ol çiftliği ve bağlar ve eşcârı mahallinde zabt edip sene tamâmında bin yüz dört esedî guruş asl-ı mâl ve ribhi edâ müyesser olmaz ise semen-i misilleri ile bey‘ ve semeninden bin yüz dört esedîyi istîfâ ve fazlasını bana îsâl ve teslîm [ile] mütevakkıf olduğu umûra mütevellî-i merkūm Hasan Efendi’yi vekîl nasb eylediğimde ol dahi vekâlet-i merkūmeyi kabûl ve hizmet-i lâzımesini edâya ta‘ahhüd eyledi dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min şehri Ramazâni’l-mübârek sene 1073.


Şuhûdü’l-hâl: Mehmed Efendi b. Ahmed el-İmâm, Odabaşı Ömer Beşe, el-Hâc Mehmed Beşe er-Râcil, Oda kâtibi Mehmed Çelebi, Hasan Efendi, Balcızâde Mustafa Çelebi, kasîrü’l-kāme Mehmed Beşe, İbrahim b. Yusuf el-Muhzır.