.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 142
Hüküm no: 69
Orijinal metin no: [6a-7]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Beşiktaş Hamamı dellâklarından Hasan Beşe b. Ali’nin Hasan Beşe b. Şâhin zimmetindeki alacağı tahsil edildiği

Kabzü’l-vasî mâle’s-sagīr Vilâyet-i Rumeli’nde Avlonya sancağında vâki‘ İskarapar kazâsına tâbi‘ Varla nâm karye sâkinlerinden olup mahmiye-i Galata a‘mâlinden kasaba-i Beşiktaş Hamâmı’nda işler iken bundan akdem vefât eden Dellâk Hasan Beşe b. Ali’nin sulbiye sagīre kızı Leyla’nın kıbel-i şer‘-i mergūbdan mansûb vasîsi olan Osman Beşe b. İbrahim meclis-i şer‘-i hatîrde bâ‘isü’l-vesîka Hasan Beşe b. Şâhin mahzarında bi’l-vesâye ikrâr ve takrîr-i kelâm edip müteveffâ-yı mezbûrun mezbûr Hasan Beşe yedinde bi’t-tarîki’l-emâne mahfûz olan on iki bin akçe müteveffâ-yı mezbûrun terekesinden olmağın sagīre-i mezbûreye bi’l-irsi’ş-şer‘î intikāl eylemiş idi el-hâletü hâzihî meblağ-ı mezbûr on iki bin akçeyi mezbûr Hasan Beşe yedinden bi’l-vesâye alıp kabz eyledim min ba‘d meblağ-ı mezkûrdan mezbûr Hasan Beşe yedinde bir akçe ve bir habbe bâkī kalmadı dedikde mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min şehri Ramazâni’l-mübârek sene 1073.


Şuhûdü’l-hâl: Musa Beşe b. Şâhin, Mehmed Beşe b. İsâ, Halil Beşe b. Hasan, Bayezid Beşe b. Mehmed, Ali Beşe b. Mehmed, Mehmed Beşe b. Osman, İbrahim Beşe er-Râcil, Hüseyin Beşe er-Râcil, İskender Beşe er-Râcil, Sinan Beşe er-Râcil, Osman Beşe er-Râcil, Siyavuş Beşe er-Râcil, İbr[a]him Beşe er-Râcil.