|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 142 Hüküm no: 68 Orijinal metin no: [6a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Tamur v. Toros’un Serkis’in oğlu Zikerya’nın tarlalarına taarruzdan menedildiği
Da‘vâ-yı tarla Vilâyet-i Anadolu’da Divriği kazâsına tâbi‘ Niger nâm karye sükkânından olup hâlâ mahmiye-i İstanbul’da ( ) mahallesinde sâkin olan işbu bâ‘isü’s-sifr Bogos v. Asadur nâm Ermeni mahfil-i kazâda, Tamur v. Toros nâm Ermeni muvâcehesinde üzerine da‘vâ ve takrîr-i kelâm edip karye-i mezbûrede vâki‘ lede’l-ahâlî ma‘lûmü’l-hudûd dokuz kıt‘a tarlalara ma‘rifet-i sâhib-i arz ile mutasarrıf olup ben mahmiye-i mezbûrede sâkin olmağla ol tarlaları vekîlim zirâ‘at ederken, mezbûr Tamur bî-vech ol tarlaları tasarrufdan men‘ eder, suâl olunup bî-vech ta‘arruzdan men‘ olunmasını taleb ederim dedikde gıbbe’s-suâl mezbûr Tamur ol tarlalar mukaddemâ Serkis nâm Ermeni’nin tasarrufunda olup mezbûr Serkis bilâ-veled hâlik olup ve ben dahi mezbûr Serkis’in oğlu oğlu Zikerya nâm sagīrin vasîsi olmağla ol tarlalar mezbûr Serkis’den oğlunun oğluna intikāl-i âdî ile intikāl eder zu‘muyla tasarruf murâd ederim deyû mukābele edicek mezbûr Tamur ol tarlalara bî-vech ta‘arruzdan men‘ olunup mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Ramazâni’l-mübârek sene 1073.
Şuhûdü’l-hâl: Mehmed Çelebi b. Abdullah, Baba Resûl b. Rıdvan, Veli b. Mahmud, Mustafa Çelebi b. İsâ, Samavan v. Bağdasar, Haçuk v. Horen, Kazar v. Ağyar.
|