|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 145 Hüküm no: 74 Orijinal metin no: [6b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Fâtıma bt. Mehmed’in evini Ayşe bt. Mehmed’e sattığı
Mülknâme-i menzil Mahmiye-i İstanbul’da Zeyrek mahallesi ahâlîsinden Fâtıma bt. Mehmed nâm hâtun meclis-i şer‘-i hatîrde bâ‘isetü’l-kitâb Ayşe bt. Mehmed nâm hâtun mahzarında ikrâr ve takrîr-i kelâm edip mahmiye-i merkūmede Keçeci Pîrî mahallesinde vâki‘ bir tarafı Muslu Çelebi mülküne ve bir tarafı Taşçı mülküne ve iki tarafı [tarîk-i] âma müntehî bir bâb fevkānî odayı ve bir matbahı ve kileri ve tahtapûşu müştemil mülk menzilimi tevâbi‘ ve levâhıkı [ile] Ayşe Hâtun’a yirmi bin akçeye bey‘ ve teslîm ol dahi ber minvâl-i muharrer iştirâ ve tesellüm ve kabûl eyledikden sonra semeni olan meblağ-ı mezbûrdan on yedi bin akçesini hâlâ mezbûre yedinden kabz eyledim, üç bin akçesi zimmetimde bâkī kaldı. Min ba‘d mezkûre Ayşe Hâtun menzil-i mezbûra mülkiyyet üzre mutasarrıfe olsun dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min şehri Ramazâni’l-mübârek li sene selâse ve seb‘în ve elf.
Şuhûdü’l-hâl: Abdülkādir Efendi el-Kâtib, Mehmed Efendi b. Yusuf, İsâ Efendi b. Musa, Mehmed Efendi b. Mustafa, Mustafa Efendi el-Müderris, Mustafa b. Abdullah, Mehmed Çelebi b. Abdullah el-Muhzır, Süleyman Çelebi b. Ali.
|