|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 148 Hüküm no: 81 Orijinal metin no: [7a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yorgaki ve Tanaş’ın Nikola v. Yani zimmetindeki alacakları tahsil edildiği
Sulh Havâss-ı Aliyye nevâhîsinden Büyükçekmece’de sâkine Mariyo bt. Yani nâm nasrâniyye meclis-i şer‘-i hatîrde nâhiye-i mezbûreye tâbi‘ Bigados nâm karyeden Nikola v. Yani muvâcehesinde ikrâr ve i‘tirâf edip sadrî oğullarım Yorgaki ve Tanaş veledey Tırandafilo’nun babalarından müntakil mallarından mezbûr Nikola zimmetinde kırk sekiz bin akçe hakları olup sagīrân-ı mezbûrân müte‘âkiben fevt olup verâseti bana münhasıra olmağla mecmû‘-ı meblağ-ı mezbûr bi hasebi’l-irs bana intikāl ettikde, zikr olunan kırk sekiz bin akçeden on altı bin akçesini mezbûr Nikola’dan ahz ve istîfâ edip bâkī otuz iki bin akçe hakkım kalmış idi hâlâ meblağ-ı bâkī otuz iki bin akçeyi da‘vâ ve taleb ettiğimde, muslihûn tavassut edip meblağ-ı bâkī da‘vâsından beni mezbûr Nikola sekiz bin akçe üzerine inşâ-i akd-i sulh ettiklerinde, ben dahi sulh-ı mezbûru kabûl ve bedel-i sulh olan meblağ-ı mezbûr sekiz bin akçeyi mezbûr Nikola yedinden tamâmen alıp kabz edip meblağ-ı bâkī otuz bin akçeye müte‘allika âmme-i de[‘â]vîden merkūm Nikola’nın zimmetini ibrâ-i âm ile ibrâ eyledim. Fîmâ ba‘d husûs-ı mezbûra mute‘allik vechen mine’l-vücûh ve sebebin mine’l-esbâb mezbûr Nikola üzerine da‘vâ ve nizâ‘ ve husûmetim yoktur dedikde mezbûr Mariyo’nun ikrâr-ı meşrûhunu el-mukarru lehü’l-mezbûr Nikola vicâhen tasdîk ve şifâhen tahkīk etmeğin mâ vaka‘a bi’t-taleb ketb olundu. Fi’l-yevmi’l-âşir min şehri Ramazâni’l-mübârek sene 1073.
Şuhûdü’l-hâl: Şaban Çavuş el-Mübâşir, Ali Beşe b. Osman Çukadar, Halil Beşe er-Râcil, el-Hâc Mehmed b. Mahmud, Oruc Çavuş b. Abdullah, Ahmed Çelebi b. Ali ed-Dâ‘î, Abdi b. Hüseyin, es-Seyyid Mustafa Çelebi b. es-Seyyid Mahmud, İbrahim b. Mahmud, David v. Güllükesri, Kiryazi v. Manol, Dimitri v. Kostantin, Hersaki v. Yorgi, Apostol v. Mihadoki, Yorgi v. İstadi.
|