|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 149 Hüküm no: 82 Orijinal metin no: [7a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Fâtıma bt. Ömer’in Kurt Çelebi b. Mehmed’e kalan borcunu ödemesi tenbih olunduğu
1000 akçe ikrâr-ı deyn Mahmiye-i İstanbul’da Kebeciler Hânı’nda sâkin bâ‘isü’l-vesîka Kurt Çelebi b. Mehmed nâm kimesne meclis-i şer‘de Fâtıma bt. Ömer nâm hâtun mahzarında üzerine da‘vâ ve takrîr-i kelâm edip târih-i kitâbdan üç sene mukaddem mezbûre Fâtıma Hâtun’a iki bin akçe ikrâz ve teslîm edip ol dahi iktirâz ve kabz eyledikden sonra silk-i mülkünde olan bir çift zümrüd taşlı altın küpe ve beş miskāl bir altın bileziğini yedimde rehin ve teslîm etmiş idi el-hâletü hâzihî meblağ-ı mezkûrun bin akçesini mukaddemâ yedinden ahz ve istîfâ ve rihân-ı mezkûreyi mezbûreye teslîm eylediğinden sonra bin akçe zimmetinde kalmış idi hâlâ meblağ-ı bâkī bin akçeyi dahi mezbûreden taleb ederim, suâl olunsun dedikde gıbbe’s-suâl mezbûre Fâtıma cevâbında fi’l-hakīka meblağ-ı mezkûr iki bin akçenin ber minvâl-i muharrer bin akçesini mukaddemâ müdde‘î-i mezbûra teslîm ve rihân-ı mezkûreyi kabz eylediğimden zimmetimde bâkī bin akçe hakkı kalmış idi deyû ikrâr etmeğin mûcebince meblağ-ı bâkī bin akçeyi müdde‘î-i mezbûra edâ ve teslîme mezbûre Fâtıma’ya ba‘de’t-tenbîh, mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Ramazâni’l-mübârek li sene selâse ve seb‘în ve elf.
Şuhûdü’l-hâl: Ebûbekir Çelebi b. Abdullah, Mustafa Çelebi b. İsâ, Abdi Çelebi b. Hüseyin, Şükür Beşe b. Mustafa, Ali Çelebi b. Muharrem, Baba Resûl b. Rıdvan.
|