|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 151 Hüküm no: 85 Orijinal metin no: [7a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Sâliha Hâtun’un Mehmed Ağa b. Ahmed isimli cündîden muhâlaa yoluyla boşandığı
Husûs-ı âti’l-beyânın mahallinde tahrîri iltimâs olunmağın savb-ı şer‘-i mergūbdan Mevlânâ Abdülbâkī Efendi irsâl olunup ol dahi mahmiye-i İstanbul’da Kefeli mahallesinde sâkin Sefer Bey nâm cündînin menziline varıp zeyl-i rakīmde muharrerü’l-esâmî olan müslimîn huzûrunda akd-i meclis-i şer‘-i şerîf ettikde, mezbûr Sefer Bey (...) sulbiye kebîre kızı Sâliha Hâtun zâtı Abdünnebî Halîfe ve Mehmed b. İsâ ta‘rîfleri ile mu‘arrefe oldukda, (...) meclis-i ma‘hûdda zevci Mehmed Ağa b. Ahmed nâm cündî muvâcehesinde bi tav‘ihâ ikrâr ve i‘tirâf (...) zevcim mezbûr Mehmed Ağa ile zimmetimde mütekarrir olan yüz elli riyâlî guruş mehr-i müeccelim ve nafaka-i iddetim (...) üzerine ve me’ûnet-i süknâm dahi kendi üzerime olmak üzre muhâla‘a-i sahîha-i şer‘iyye (...) edip ol dahi hul‘-ı mezbûru kabûl ettikden sonra hukūk-ı zevciyyete ve gayra müte‘allika (...) her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde [7b] ikrâr-ı meşrûhunu mezbûr Mehmed Ağa vicâhen ve şifâhen tasdîk ve tahkīk etmeğin Mevlânâ-yı mezbûr vâki‘-ı hâli mahallinde tahrîr, ba‘dehû ma‘an irsâl olunan Mahmud Beşe ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâlis min Şevvâli’l-mükerrem li sene selâse ve seb‘în ve elf.
Şuhûdü’l-hâl: Ahmed Efendi b. Mehmed el-İmâm, Abdünnebî Çelebi el-Müezzin, Ali Beşe b. Hasan, Haydar Beşe b. Abdullah, Halil Beşe b. Mehmed, Mahmud Beşe b. Süleyman, Rüstem Beşe b. Abdullah, Mahmud Beşe b. Muharrem, Mehmed Çelebi b. İsâ, Mahmud Çavuş b. Abdünnebî, Şâmî Hüsrev Beşe.
|