|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 152 Hüküm no: 87 Orijinal metin no: [7b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mahmud b. Yusuf’un İnegöl’deki bahçesini el-Hâc Mustafa Ağa b. İbrahim’e sattığı
Mülknâme-i Bahçe Vilâyet-i Anadolu’da İnegöl kazâsına tâbi‘ Eseren nâm karye sâkinlerinden Mahmud b. Yusuf nâm kimesne meclis-i şer‘-i hatîr-i lâzımü’t-tevkīrde fahrü’l-eşbâh el-Hâc Mustafa Ağa b. İbrahim mahzarında ikrâr ve takrîr-i kelâm edip karye-i mezbûrede vâki‘ bir tarafdan Civil? Ali mülkü ve bir tarafdan Acem Bayram mülkü ve bir tarafdan Turfanda oğlu Osman mülkü ve bir tarafdan değirmen nehri ile mahdûd eşcâr-ı müsmire ve gayr-ı müsmireyi müştemil mülk bahçemi, üç bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr el-Hâc Mustafa Ağa’ya bey‘ ve ol dahi minvâl-i muharrer üzre iştirâ ve kabûl eyledikden sonra, semeni olan meblağ-ı mezbûr üç bin akçeyi mezbûr Mustafa Ağa’nın yedinden bi’t-tamâm ahz u kabz edip meblağ-ı mezkûru mahallinde zabt ve tasarrufa mezbûr Mustafa Ağa’yı taslît eyledim ba‘de’l-yevm zikr olunan bahçe mezbûr Mustafa Ağa’nın mülk-i müşterâsıdır, keyfe mâ yeşâ’ ve yürîd mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ min [şehri] Şevvâli’l-mükerrem sene 1073.
Şuhûdü’l-hâl: Mehmed Beşe b. Mahmud er-Râcil, Hasan Beşe b. Ahmed er-Râcil, Halil Çelebi b. Mustafa el-Yesâri, Ömer Beşe b. Hızır, Ali b. Timur, Mehmed b. İbrahim, Hasan b. Ali, Resûl b. Rıdvan.
|