.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 152
Hüküm no: 88
Orijinal metin no: [7b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Fâtıma Hanım bt. Ekmekçizâde Ahmed Paşa’nın Langa yakınındaki menzilini vakf ettiği

Vakfiye-i Ekmekçizâde Fâtıma Hanım Elhamdü li veliyyihî ve’s-salâtü alâ nebiyyihî Muhammedin ve âlihî ve ashâbihi’l-müte’eddibîne bi âdâbih ammâ ba‘d işbu kitâb-ı sıhhat-nisâbın tahrîrine bâ‘is ve bâdî budur ki mahrûse-i Galata a‘mâlinden Beşiktaş nâhiyesine tâbi‘ Ortaköy demekle ma‘rûfe karyede sâkine sâhibetü’l-hayrât umdetü’l-muhadderâti’l-muvakkarât, üsvetü’l-mestûrâti’l-mükerremât Fâtıma Hanım bt. el-merhûm Ekmekçizâde Ahmed Paşa vakf-ı âti’l-beyânı ikrâra ba‘dehû da‘vâ-yı rücû‘ ve istirdâda vekîl olup mûmâ-ileyhâyı bi’l-ma‘rifeti’ş-şer‘iyye ârifân olan Mustafa Ağa b. Mehmed ve Mehmed Efendi b. Mahmud şehâdetleriyle şer‘an vekâleti sâbite olan Ahmed Bey b. İsâ meclis-i şer‘-i hatîrde vakf-ı câi’z-zikre mütevellî ta‘yîn ettikleri Ali Bey b. Mehmed el-Yesâri muvâcehesinde bi’l-vekâle ikrâr ve takrîr-i kelâm edip müvekkile-i müşârün-ileyhâ Fâtıma Hanım mahmiye-i İstanbul’da Langa kurbunda Dülbendçi Hüsam mahallesinde vâki‘ bir tarafdan ba‘zan Belkıs bt. Abdullah ve ba‘zan Ayşe Hâtun mülkleri ve bir tarafdan ba‘zan el-Hâc İsmail b. Abdullah ve ba‘zan iplikçi kızı İsmihan Hâtun mülkleri ve bir tarafdan Rıdvan Halîfe mülkü ve bir tarafdan tarîk-i âm ile mahdûd altı bâb fevkānî ve altı tahtânî odaları ve arsa-i hâliye ve mahzeni müştemil mülk menzilini, hasbeten lillâhi te‘âlâ vakf ve haps edip şöyle şart eyledi ki hayâtda oldukça menzil-i mezbûrun gallesine kendi mutasarrıfe ola, vefât ettikden sonra mütevellî-i müte‘ayyin mezbûr Ali Bey yediyle îcâr olunup hâsıl olan gallesinden kifâyet mikdârı mahmiye-i mezbûrede Molla Hüsrev mahallesinde merhûm-ı mezkûr Ahmed Paşa türbe-i şerîfelerinde eczâ-i münîfe tilâvet olunup sevâbı rûhuna ihdâ oluna ve mezbûr Ali Bey vakf-ı mezbûra mütevellî ve hem kâtib olup kitâbet hizmeti mukābelesinde menzil-i mezbûrun gallesinden yevmî iki akçe vazîfeye mutasarrıf ola ba‘dehû tevliyyet ve kitâbet re’y-i hâkimü’ş-şer‘a müfevvaz ola ve vakf-ı mezbûrun tebdîl ve tağyîri merreten ba‘de uhrâ yedinde ola deyû şart ve ta‘yîn edip menzil-i mezbûru fâriğan ani’ş-şevâgil mütevellî-i mezbûra teslîm edip ol dahi tesellüm ve kabz eyledi dedikde gıbbe’t-tasdîki’ş-şer‘î vekîl-i mezbûr inân-ı kelâmını semt-i rücû‘a atf edip eğer ki vakf-ı akār muhtâr-ı eimme-i ahyâr İmâm-ı A‘zam ve hümâm-ı akdem Ebû Hanîfe el-Kûfî -cûziye hayrü’l-cezâ ve kûfiye- hazretleri katında sahîh ve câiz, lâkin menzile-i âriyetde olmağla şeref-i lüzûmu hâiz olmadığından mâ‘adâ, âlim-i rabbânî hazret-i imâm Muhammed b. Hasan eş-Şeybânî katında vâkıf menâfi‘-i vakfı kendi nefsine şart etmekle bâtıl olup rücû‘ meşrû‘ olmağın vakf-ı mezbûrdan bi’l-vekâle rücû‘ eyledim menzil-i mezbûru istirdâd ederim deyicek mütevellî-i mezbûr cevâb-ı bâ savâba mütesaddî olup fi’l-vâki‘ hâl bast olunan minvâl üzre idiği cây-ı kīl u kāl değildir lâkin âlim-i rabbânî fâzıl-ı samedânî İmâm Ebû Yusuf eş-şehîr bi’l-imâmi’s-sânî katında vâkıf mücerred, vakf ettim demekle, şart-ı mezbûr ile dahi olursa vakf-ı mezbûr sahîh ve lâzım olduğu emr-i ma‘lûmdur deyû red ve teslîmden imtinâ‘ ve husûmet ve nizâ‘ edip hâkim-i muvakki‘-i sadr-ı kitâb tûbâ-lehû ve hüsnü me’âb huzûrunda müterâfi‘ân olduklarında, hâkim-i mûmâ-ileyh -esbağallâhu te‘âlâ ni‘amehû aleyh- dahi cânib-i vakfa nazar ve mübtil-i hayr olmakdan hazer edip teşyîd-i kavâ‘id-i hayrı evlâ ve ahrâ görüp alâ kavli men yerâhü mine’l-eimmeti’l-müctehidîn şart-ı mezbûr ile vakf-ı merkūmun sıhhat ve lüzûmuna hükm-etmekle vakf-ı mezbûr sahîh ve lâzım olup nakz ve nakzına mecâl muhâl ve tebdîl ve tağyîri mümteni‘ü’l-ihtimâl oldu. Fe-men beddelehû ba‘demâ semi‘ahû fe-innemâ ismuhû ale’l-lezîne yübeddilûnehû inna’llâhe semî‘un alîm ve ecrü’l-vâkıfi ale’l-hayyi’l-cevâdi’l-kerîm. Hurrire fi’l-yevmi’r-râbi‘ ve’l-ışrîn min Cemâziyelâhire li sene selâse ve seb‘în ve elf.


Şuhûdü’l-hâl: Ebûbekir Çelebi b. Mehmed el-Müezzin, Mehmed Çelebi b. Mahmud kâtib-i Muhâsebe, Mehmed Çelebi b. Mehmed, Mustafa Efendi b. Halil, Evliyâ Çelebi b. Mehmed, Mehmed Efendi b. Mustafa, Mehmed b. Yusuf, Mustafa Bey b. Hasan, Osman Beşe el-Muhzır.