|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 161 Hüküm no: 101 Orijinal metin no: [8b-7] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Murad v. Matik’in Eğin’e tabi Liç karyesindeki tarlasını Asadur v. Serkis’e sattığı
Tefvîz-i tarla Mahmiye-i İstanbul’da Ekmekçi tâifesinden Murad v. Matik nâm Ermeni meclis-i şer‘de bâ‘isü’l-kitâb Asadur v. Serkis nâm Ermeni muvâcehesinde ikrâr ve takrîr-i kelâm edip vilâyet-i Anadolu’da Eğin kazâsına tâbi‘ Liç nâm karyede vâki‘ bir tarafı Kurt Beşe tarlasına ve bir tarafı Keşiş bağına ve bir tarafı Kaplanoğlu tarlasına ve bir tarafı Mıgırdiç tarlasına müntehî tahmînen bir şinik tohum istî‘âb eder bir kıt‘a tarlamın hakk-ı tasarrufunu sâhib-i arz ma‘rifetiyle on riyâlî guruş bedel mukābelesinde merkūm Asadur’a ferâğ ve tefvîz, ol dahi vech-i muharrer üzre tefevvüz ve kabûl eyledikden sonra bedel-i tefvîz olan meblağ-ı mezbûr on riyâlî guruşu mezbûr Asadur yedinden tamâmen alıp kabz edip mârrü’z-zikr tarlayı mahallinde zabt ve tasarrufa merkūm Asadur’u taslît eyledim dedikde gıbbe’t-tasdîki’l-mu‘teber mâ hüve’l-vâki‘ gıbbe’t-taleb ketb olundu. Fi’l-yevmi’s-sâbi‘ min Şevvâli’l-mükerrem li sene selâse ve seb‘în ve elf.
Şuhûdü’l-hâl: Baba Resûl b. Rıdvan, Şükrullah Çelebi b. Mustafa, Ahmed b. Abdülcebbar, Mehmed el-Muhzır, Badogam v. Azad, Yani v. Hürmüz, Haçuk v. Arakil.
|