|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 166 Hüküm no: 110 Orijinal metin no: [9b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Bâli Beşe b. Şükrullah’ın Çerkez asıllı cariyesi Gonca bt. Abdullah’ı azat ettiği
İkrâr bi’l-ıtk Husûs-ı âti’l-beyânın mahallinde tahrîri iltimâs olunmağın kıbel-i şer‘-i enverden Mevlânâ Keşfî Mustafa Efendi irsâl olunup ol dahi mahmiye-i İstanbul’da Akseki mahallesinde Bâli Beşe b. Şükrullah’ın sâkin olduğu menzile varıp zeyl-i rakīmde muharrerü’l-esâmî olan müslimîn huzûrunda akd-i meclis-i şer‘-i şerîf eyledikde merkūm Bâli Beşe meclis-i ma‘kūd-ı mezbûrda takrîr-i kelâm edip işbu bâ‘isetü’l-kitâb orta boylu açık kaşlı gök elâ gözlü Çerkesiyyetü’l-asl bundan akdem câriye-i memlûkem olan Gonca bt. Abdullah’ı hasbeten lillâhi’l-kerîm ve taleben li merzâti’r-Rabbi’r-rahîm târih-i kitâbdan on sene mukaddem tahrîr ve i‘tâk ve zümre-i harâir-i asliyyâta idrâc ve ilhâk eylemişimdir mevsûfe-i mezbûre Gonca târih-i mezbûrdan berî sâir harâir-i asliyyât gibi hürre olup üzerinde velâdan gayrı hakkım kalmamışdır dedikde vâki‘ hâli Mevlânâ-yı mezbûr mahallinde tahrîr, ba‘dehû ma‘an irsâl olunan Receb b. Osman ile meclis-i şer‘-i hatîre gelip ihbâr ve takrîr eylemeğin, mâ vaka‘a bi’t-taleb ketb olundu. Fi’l-yevmi’s-sâbi‘ min [şehri] Şevvâli’l-mükerrem li sene selâse ve seb‘în ve elf.
Şuhûdü’l-hâl: Es-Sâbikūn.
|