.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 165
Hüküm no: 109
Orijinal metin no: [9a-7]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Bâli Beşe b. Şükrullah’ın vasiyeti ve Sâfiye Hâtun bt. Abdullah ile Kâtibe Hâtun bt. Abdullah’a olan borçlarını itirafı

Vasiyyet Husûs-ı âti’l-beyânın mahallinde tahrîri iltimâs olunmağın kıbel-i şer‘-i mutahhardan Mevlânâ Keşfî Mustafa Efendi irsâl olunup ol dahi mahmiye-i İstanbul’da Akseki mahallesinde Bâli Beşe b. Şükrullah’ın sâkin olduğu menziline varıp zeyl-i rakīmde muharrerü’l-esâmî olan müslimîn huzûrunda akd-i meclis-i şer‘-i şerîf eyledikde mezbûr Bâli Beşe meclis-i ma‘kūd-ı mezbûrda işbu hâfızü’l-kitâb İsmail Çelebi b. Süleyman mahzarında takrîr-i kelâm edip ben bi irâdetillâhi te‘âlâ dâr-ı fenâdan dâr-ı bekāya irtihâl eylediğimde cemî‘ malımın sülüsünden [9b] altmış esedî guruş ile sekiz bin akçe ifrâz olunup meblağ-ı mezbûr altmış esedî guruşdan bin akçesini iskāt-ı salâtıma ve kadr-i kifâye techîz ve tekfînime ve yevm-i fevtimden üçüncü günü ve yedinci günü ve sâir eyyâm-ı mu‘tâdede rûhum için tabh-ı ta‘âm olunup fukarâya it‘âm oluna ve meblağ-ı merkūm sekiz bin akçeden Timurhan ve Gonca ve Lütfiye ve Şahbaz nâm mu‘takalarımdan her birine ikişer bin akçe verile deyû vasiyyet ve bu vasiyyetimi tenfîze mezkûr İsmail Çelebi’yi vasiyy-i muhtâr nasb ve ihtiyâr eyledim dedikde ol dahi vesâyet-i mezbûreyi kabûl ve hizmet-i lâzımesini edâya ta‘ahhüd eyledikden sonra mezbûr Bâli Beşe meclis-i ma‘kūd-ı mezbûrda zevcetân-ı menkûhetânı Sâfiye Hâtun bt. Abdullah ve Kâtibe Hâtun bt. Abdullah mahzarlarında her birinin zimmetimde mütekarrir ve ma‘kūdun-aleyh onar bin akçe mehr-i müeccelleri vardır deyû ikrâr ve i‘tirâf eyledikde gıbbe’t-tesâdıki’ş-şer‘î vâki‘ hâlî Mevlânâ-yı mûmâ-ileyh mahallinde tahrîr ba‘dehû ma‘an irsâl olunan Receb b. Osman ile meclis-i şer‘a gelip ihbâr ve takrîr eylemeğin mâ vaka‘a bi’t-taleb ketb olundu. Fi’l-yevmi’s-sâbi‘ min Şevvâli’l-mükerrem li sene selâse ve seb‘în ve elf.


Şuhûdü’l-hâl: Yusuf Efendi b. Abdullah el-İmâm, el-Hâc Hasan b. Ali, Mustafa Efendi b. eş-Şeyh Mehmed Efendi, Şaban Efendi b. Ahmed el-imâm bi Yavaşça, Hasan Beşe b. Mehmed, Hasan Çelebi b. Osman, Mehmed Çelebi b. Hasan, Osman Beşe, Receb b. Osman, Mehmed Çelebi b. Süleyman, Süleyman Beşe b. Nurullah.