.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 170
Hüküm no: 117
Orijinal metin no: [10a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Zülfi Hâtun bt. Abdullah’ın Mehmed Ağa’dan alacağını tahsil ettiği

Bi’l-vekâle kabz-ı deyn Mahmiye-i İstanbul’da Gazanfer Ağa mahallesi sâkinelerinden Mehmed ve Abdullah ibney Osman Bey nâm sagīrlerin vâlideleri ve kıbel-i şer‘den mansûbe vasîleri olan Zülfi Hâtun bt. Abdullah tarafından husûs-ı âtîye vekîl olup zâtını ma‘rifet-i şer‘iyye ile ârifân Ahmed Efendi b. Hüseyin ve Hasan Beşe b. Hızır nâm kimesneler şehâdetleri ile şer‘an vekâleti sâbite olan zevci Mehmed b. Osman meclis-i şer‘-i hatîrde sagīr-i mezbûrânın li eb karındaşları fahrü’l-eşbâh Mehmed Ağa mahzarında bi’l-vekâle ikrâr ve takrîr-i kelâm edip müvekkilem Zülfi Hâtun kendi hâlinde ve sagīrân-ı mezbûrânın mallarından mezbûr Mehmed Ağa’ya ikrâz ve teslîm eylediği zimmetinde olan kırk iki bin akçeyi vekâletim hasebiyle mezbûr Mehmed Ağa’nın yedinden bi’t-tamâm ahz u kabz eyledim. Meblağ-ı mezbûrdan mezbûr Mehmed Ağa zimmetinde bir akçe ve bir habbe bâkī kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min Şevvâli’l-mükerrem li sene selâse ve seb‘în ve elf.


Şuhûdü’l-hâl: Mefharü’l-kuzât Abdülbâkī Efendi, Umdetü’l-kuzât Hüseyin Efendi, Muharrem b. Abdullah, Abdi Çelebi b. Hüseyin, Şükür Beşe b. Mustafa, Osman b. Abdullah, Ramazan b. Ali.