.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 169
Hüküm no: 116
Orijinal metin no: [9b-7]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Sâliha bt. Mahmud’un Muharrem Bey b. Hasan’daki alacağını tahsil ettiği

Saka gediğine müte‘allikadır Mahrûse-i Üsküdar’a tâbi‘ Kadıköy nâm karye sâkinelerinden Sâliha bt. Mahmud nâm hâtun meclis-i şer‘-i şerîf-i lâzımü’t-teşrîfde, işbu bâ‘isü’l-kitâb Muharrem Bey b. Hasan mahzarında ikrâr ve takrîr-i kelâm edip mahmiye-i İstanbul’da Atmeydanı başında vâki‘ çeşmede ruûs-ı hümâyûn ile mutasarrıf olduğum bir re’s at sakası gediğime ve iki mülk at kırbası ve iki kovaya bi gayr-ı vech-i şer‘î vaz‘-ı yed eder hâlâ kasr-ı yedine tenbîh olunmak matlûbumdur deyû mezbûr Muharrem Bey’den da‘vâ eylediğimde merkūm Muharrem Bey cevâbında bin altmış beş Receb’inin ruûs-ı hümâyûn ile mutasarrıf olduğun bir re’s at sakası gediğini ve iki kat‘ kırbası ve iki kovasını dört bin akçe mukābelesinde târih-i mezbûrda bana ferâğ edip bedel-i ferâğ olan dört bin akçeyi yedimdem alıp kabz eyledin deyû def‘ eyledikde ben dahi inkâr etmekle beynimizde münâza‘ât-ı kesîre vukū‘undan sonra vesâtat-ı muslihîn ile merkūm Muharrem Bey benim ile bin altı yüz akçe üzerine sulh olup ben dahi sulh-ı mezbûru kabûl ve bedel-i sulh olan meblağ-ı mezbûr bin altı yüz akçeyi mezbûr Muharrem Bey yedinden bi’t-tamâm ahz u kabz edip husûs-ı merkūma müte‘allika da‘vâdan mezbûr Muharrem Bey’in zimmetini ibrâ eyledim dedikde mâ vaka‘a bi’t-taleb ketb olundu. Fi’l-yevmi’s-sânî aşer min Şevvâli’l-mükerrem li sene selâse ve seb‘în ve elf.


Şuhûdü’l-hâl: Bosnavî İslâm Çavuş el-Mübâşir, Mustafa Çelebi b. Mehmed Çelebi Bülbülzâde, Hacı Ali Bey Yekçeşm, Hüseyin Çelebi b. Pîrî, Cevher Fürûş Emir Çelebi, Ahmed Çelebi b. Ali Serbölük.