|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 171 Hüküm no: 119 Orijinal metin no: [10a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Petiso v. Kiko ile Kolo v. Kosta’nın muhtelif yerlerdeki bağ, bostan, tarla ve hanelerinin müşterek olduğu
Mülknâme-i bağ ve bostan ve tarla Vilâyet-i Rumeli’nde Upar kazâsına tâbi‘ Doşar? nâm karyeden Petiso v. Kiko nâm zimmî ile karındaşı Kosta nâ[m] zimmî meclis-i şer‘de ibni ammileri râfi‘ü’l-vesîka Kolo v. Kosta muvâcehesinde her biri takrîr-i kelâm edip bizim babamız merkūm Kiko ile mezbûr Kolo’nun babası li ebeveyn karındaşlar olup karye-i mezbûrda vâki‘ babalarından intikāl eden cemî‘ emlâk ve tarlaları iştirâk-i seviy üzre mutasarrıflar olup helâk olduklarından sonra mezbûr Kolo kemâ kân bizim ile iştirâk-i seviy üzre tasarruf murâd ettikde, bizim babamız Kiko karye-i mezbûrede kendi malı ile menzil ve on kıt‘a tarla ve iki bağ ve iki bostan iştirâ etmiş idi deyip mezbûr Kolo ile beynimizde nizâ‘ vâki‘ olmuş idi hâlâ merkūm Kolo husûs-ı mezbûr için bize dört bin akçe def‘ ve teslîm eyledi biz dahi tesellüm ve kabz edip karye-i mezbûrede vâki‘ cümle bağ ve menzil ve bostan ve tarlalar İstanbul’da Kartal’da ve Parmakkapı’da ve Cebeali’de vâki‘ üç yüz hânede olan âlât-ı lâzıme ke’l-evvel merkūm Kolo ile ale’s-seviyye mülkümüz ve taht-ı tasarrufumuzdadır dediklerinde, mezbûrânın cemî‘ kelimâtını mezbûr Kolo tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin min Şevvâli’l-mükerrem sene 1073.
Şuhûdü’l-hâl: Mustafa b. Abdullah, Hüseyin Beşe b. Hasan, Receb b. Abdullah, Mehmed Beşe b. Mahmud, Mustafa b. Mehmed, el-Hâc Mehmed b. Mahmud, Andriye v. Duşte, Mozaki v. Murad, Dud v. Petro, Kiko v. Menasar ve gayruhüm.
|