|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 189 Hüküm no: 146 Orijinal metin no: [12b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yakub Odabaşı b. Hasan’ın arsasını Fâtıma Hâtun bt. el-Hâc Kalender’e sattığı
Mülknâme Mahmiye-i İstanbul’da Sofular mahallesi ahâlîsinden Yakub Odabaşı b. Hasan meclis-i şer‘-i hatîr-i lâzımü’t-tevkīrde Fâtıma Hâtun bt. el-Hâc Kalender tarafından husûs-ı âti’l-beyâna vekîl olan sadrî oğlu Abdülbâkī Beşe b. Mustafa mahzarında tav‘an ikrâr edip mahalle-i merkūmede vâki‘ bir tarafı Yorganî el-Hâc Mehmed mülküne ve bir cânibi Hüseyin Odabaşı mülküne ve bir cânibi ba‘zan gallesi Sofular câmi‘i müezzinlerine vakf olan menzile ve ba‘zan Şaban Çelebi menziline ve bir cânibi tarîk-i hâssa müntehî bi’r-i mâyı müştemil tûlen yirmi altı ve arzen on dört bi hesâb-ı şatrancî cem‘an üç yüz altmış dört zirâ‘ mülk arsa-i hâliyemi, yirmi bin fıddî akçeye müvekkile-i merkūme Fâtıma Hâtun için vekîl-i merkūm Abdülbâkī Beşe’ye tarafeynden îcâb ve kabûlü hâvî bey‘-i kat‘î ile bey‘ ve teslîm ol dahi minvâl-i muharrer üzre iştirâ ve tesellüm eyledikden sonra, semeni olan yirmi bin akçeyi vekîl-i mezbûr yedinden alıp kabz eyledim min ba‘d arsa-i mahdûde-i mezkûre merkūme Fâtıma Hâtun’un mülk-i müşterâsı olup keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ aşer min Şevvâli’l-mükerrem sene 1073.
Şuhûdü’l-hâl: Latîf Efendi el-İmâm, Mehmed Efendi el-Müezzin, el-Hâc Hüseyin, el-Hâc Muharrem, el-Hâc Ali, Abdülbâkī Çelebi b. Mustafa, Osman Halîfe el-Müezzin, Hüseyin Beşe sâbıkan Odabaşı, Ahmed Bey b. Hüseyin el-Cündî Yorgancı Sâlih Beşe, Şaban Çelebi er-Râcil, Cebeci Mehmed Çelebi, Berber Mehmed Beşe, Cafer Beşe er-Râcil.
|