|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 191 Hüküm no: 149 Orijinal metin no: [12b-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Saraylı Ayşe bt. Abdullah’ın kocası Yusuf’dan kalan mirası için oğlu Ahmed Ağa ile sulh olduğu
Sulh-i tehârüc Mahmiye-i İstanbul’da Topkapısı kurbunda Bayezid Ağa mahallesinden olup bundan akdem vefât eden el-Hâc Yusuf [b.] Ali’nin verâseti, zevce-i metrûkesi Saraylı Ayşe bt. Abdullah ile sulbî kebîr oğlu Ahmed Ağa’ya münhasıra olduğu şer‘an zâhir ve müte‘ayyin oldukdan sonra mezbûre Ayşe meclis-i şer‘de müteveffâ-yı [13a] mezbûrun muhallefâtına vâzı‘u’l-yed olan oğlu işbu râfi‘ü’l-vesîka mezbûr Ahmed Ağa mahzarında ikrâr ve takrîr-i kelâm edip zevcim müteveffâ-yı mezbûrun muhallefâtından sekiz sehimde bir sehim sümün hisse-i şer‘iyyemi da‘vâ ve taleb eylediğimde mezbûr Ahmed Ağa dahi vesâtat-ı muslihîn ile şerâit-i sulhu hâvî tehârüc-i şer‘î tarîki üzre altı bin akçeye beni ıslâh ve ihrâc eylediğinde, ben dahi sulh-ı mezbûru kabûl ve bedel-i sulh-ı mezbûr altı bin akçeyi yedinden tamâmen alıp kabz edip müteveffâ-yı mezbûrun akār ve menkūl ve esâs-ı beyt ve evânî-i nühâsiyye ve gayr-ı nühâsiyyede ism-i mal ıtlâk olunur kalîl ve kesîr, celîl ve hakīr muhallefâta müte‘allika de‘âvî ve mütâlebât ve eymân-ı muhâsamâtdan mezbûr Ahmed Ağa’nın zimmetini ibrâ-i âm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâdis aşer min Şevvâli’l-mükerrem sene 1073.
Şuhûdü’l-hâl: Anber Ağa b. Abdullah, Sünbül Ağa b. Abdullah, Hacı Yusuf Bey b. Mehmed, Hüseyin Çelebi b. Ahmed el-Müezzin, Mustafa Çelebi b. Mehmed el-Müezzin, Hacı Mahmud b. Eşref el-mu‘îd, Ahmed Çelebi b. Hızır, es-Seyyid Mehmed Çelebi b. Ahmed, Baltacı Zülfikār Bey b. ( ), Mustafa Bey b. Abdullah, Mustafa b. Mehmed el-Müezzin, Bedirhan b. Hacı Murad.
|