|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 192 Hüküm no: 150 Orijinal metin no: [13a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
El-Hâc Yusuf b. Ali’nin mehir borcuna karşılık Saraylı Ayşe bt. Abdullah’a menzil verildiği
Mehr mukābelesinde menzil bey‘i Mahmiye-i İstanbul’da Topkapısı dâhilinde Bayezid Ağa mahallesinde sâkine iken bundan akdem vefât eden el-Hâc Yusuf b. Ali’nin terekesine vâzı‘u’l-yed olan sulbî kebîr oğlu Ahmed Ağa meclis-i şer‘de müteveffâ-yı mezbûrun zevce-i metrûkesi Saraylı Ayşe bt. Abdullah nâm hâtun mahzarında ikrâr ve takrîr-i kelâm edip babam müteveffâ-yı mezbûrun terekesinden olup mahalle-i merkūmede vâki‘ bir tarafdan Sâliha Sultan bahçesi ve bir tarafı Odabaşı Ali Çelebi mülkü ve bir tarafdan Hıçak nâm Ermeni menzili ve taraf-ı râbi‘i tarîk-i âma müntehî fevkānî ve tahtânî büyûtu müştemil mülk menzili mezbûr[e] Ayşe’nin babam müteveffâ-yı mezbûr zimmetinde mütekarrir ve ma‘kūdun-aleyh olan on altı bin akçe mehr-i müeccel me’ûneti mukābelesinde mezbûreye verip ol dahi ber minvâl-i muharrer kabûl ve kabz eyledi. Min ba‘d menzil-i mahdûd-ı mezkûr merkūme Ayşe’nin mülkü olup benim kat‘â alâka ve medhalim yoktur dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-hâmis aşer min [şehri] Şevvâli’l-mükerrem sene 1073.
Şuhûdü’l-hâl: Es-Sâbikūn.
|