|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 192 Hüküm no: 151 Orijinal metin no: [13a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
es-Seyyid Mahmud Efendi b. Receb’in vârisi Receb Beşe b. Mustafa ile sulh oldukları
Sulh Vilâyet-i Anadolu’da Ulaş kazâsına tâbi‘ Tarhana nâm karyeden olup mahmiye-i İstanbul’da Sâlih Paşa mahallesinde sâkine Receb Beşe b. Mustafa nâm kimesnenin menzilinde fevt olan es-Seyyid Mahmud Efendi b. Receb sulbiyenin verâseti, vâlidesi Akpula Hâtun ile li ebeveyn kız karındaşları Ayşe ve Meryem nâm hâtunlar ve ibni ammileri Züfer ve Şaban ibney Veznedâr nâm kimesnelere münhasıra olduğu şer‘an zâhir oldukdan sonra, mezbûrât Akpula ve Ayşe ve Meryem ve merkūmân Züfer ve Şaban taraflarından zikri âtî husûsa ve da‘vâya ve sulh ve ibrâya vekîller olup yine karye-i mezbûrede Edhem b. Hüseyin ve Ahmed b. Hüseyin şehâdetleriyle vekâletleri sâbite olan mezbûretân Ayşe ve Meryem’in zevcleri Mehmed b. Halil ve Mustafa b. Mehmed nâm kimesneler meclis-i şer‘de râfi‘ü’l-kitâb merkūm Receb Beşe mahzarında her biri bi’l-vekâle ikrâr ve takrîr-i kelâm edip mezbûr es-Seyyid Mahmud Efendi fevt oldukda terekesin veresesine îsâl için işbu merkūm Receb Beşe’yi vasiyy-i muhtâr nasb ettikde, vefâtından sonra kassâm defteri[nde] nâtık olduğu üzre terekesini mukaddemâ verese-i mezbûreye teslîm eyleyip lâkin defterden hâric terekeden beynimizde ma‘lûm ba‘zı eşyâsını ihtifâ eylemişdir deyû bi’l-vekâle merkūm Receb Beşe’yi da‘vâ ve beynimizde münâza‘ât-ı kesîre vukū‘undan sonra, mezbûr Receb Beşe da‘vâ-yı mezbûreden bizi üç bin akçe üzerine sulh ettikde, biz dahi bi’l-vekâle sulh-ı mezbûru kabûl ve bedel-i sulh olan meblağ-ı mezbûru müvekkillerimiz için alıp kabz edip husûs-ı mezbûra müte‘allik da‘vâdan ve beynimizde ma‘lûm zülüflük akçesi ve çuka ferâce da‘vâsından mezbûr Receb Beşe’nin zimmetini vekâletimiz hasebiyle ibrâ-i âm-ı kātı‘ü’n-nizâ‘ ile ibrâ ve iskāt eyledik dediklerinde, gıbbe’t-tasdîk mâ [va]ka‘a bi’t-taleb ketb olundu. Fi’l-yevmi’l-hâmis aşer min Şevvâli’l-mükerrem sene 1073.
Şuhûdü’l-hâl: İbrahim Efendi b. Halil, Receb b. Şaban, Mustafa b. İslâm, Hacı Mahmud b. Musa, Ali b. Sadi, Mustafa b. Ramazan, Ramazan b. Güvendik.
|