.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 196
Hüküm no: 158
Orijinal metin no: [13b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


El-Hâc Receb b. Abdullah’ın Şilo v. Todori’den alacağını tahsil ettiği

İbrâ Mahmiye-i İstanbul’da Karagümrük’de Ali Paşa-yı Cedîd mahallesi ahâlîsinden el-Hâc Receb b. Abdullah nâm kimesne tarafından husûs-ı âti’z-zikre vekîl olup Müezzin Ahmed Halîfe b. İbrahim ve Mustafa b. Sefer nâm kimesneler şehâdetleri ile vekâleti sâbite olan Mustafa b. Zülfi nâm kimesne meclis-i şer‘-i hatîr-i lâzımü’t-tevkīrde hâfızü’l-vesîka Şilo v. Todori nâm zimmî muvâcehesinde bi’l-vekâle ikrâr edip müvekkilim mezbûr el-Hâc Receb mezbûr Şilo’ya mukaddemâ karz verdiği elli iki bin akçenin kırk sekiz bin akçesini mezbûr Şilo zimmetinden alıp kabz edip dört bin akçesi mezkûr zimmî zimmetinde bâkī kalmış idi el-hâletü hâzihî meblağ-ı mezbûr dört bin akçenin üç bin akçesini mezbûr zimmî yedinden alıp kabz edip bâkī kalan bin akçesinden mezbûr Şilo zimmetini ibrâ eyledim dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâbi‘ aşer min Şevvâli’l-mükerrem sene 1073.


Şuhûdü’l-hâl: Abdülbâkī Efendi el-Kâtib, Sâlih Çelebi el-İmâm, Hüseyin Çelebi b. Yusuf, Mustafa Çelebi b. Hüseyin, Hasan Beşe b. Abdullah, Mustafa Çelebi b. Mehmed, Mustafa Beşe b. Rıdvan çorbacı, Abdi Çelebi el-Muhzır.