.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 197
Hüküm no: 162
Orijinal metin no: [13b-7]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Muslu Beşe b. Hızır’ın zapt ettiği arsanın yol olduğu

İsbât-ı tarîk Mahmiye-i İstanbul’da Elvanzâde mahallesi ahâlîsinden Murtaza b. Abdülmennân ve el-Hâc Mehmed b. Ali ve Abdülbâkī Efendi b. el-Hâc Ferhad ve Hatîb Ahmed Efendi b. Mustafa ve Abdurrahman Çelebi b. Mehmed ve Murad Beşe b. Sefer ve sâirleri meclis-i şer‘de herbiri takrîr-i kelâm edip işbu hâzır bi’l-meclis Muslu Beşe b. Hızır mahalle-i mezbûrede vâki‘ bir tarafı İsmail Çelebi tasarrufunda olan menzile ve bir tarafı el-Hâc Mehmed menzili tarafında olan su kuyusuna ve bir tarafı mezbûr Muslu Beşe tasarrufunda olan menzilin kârgîr duvarına ve bir tarafı Ahmed veresesi mülklerine müntehî kadîmü’l-eyyâmdan bu âna gelince âmme-i nâs mürûr edecek tarîk-i âmı mezbûr Muslu Beşe fuzûlen zabt eylemişdir. Kıbel-i şer‘den üzerine varılıp vâki‘ü’l-hâl mahalle-i mezbûreye karîb olan mahallât ahâlîsinden suâl olunup haberleri tahrîr olunmak murâdımdır dediklerinde, kıbel-i şer‘den Mevlânâ Ahmed Efendi irsâl olunup ol dahi zikr olunan mahalle varıp zeyl-i vesîkada isimleri mastûr olan müslimîn huzûrunda ba‘de’l-keşf mezbûr Muslu Beşe’den suâl olundukda merkūm Muslu Beşe cevâbında zikr olunan arsayı Medîne-i Münevvere vakfından olmak üzre icâre-i mu‘accele ve müeccele ile mutasarrıfesi olan Ayşe nâm hâtundan bedel-i ma‘lûme [ile] tefevvüz eyledim ana binâ’en vaz‘-ı yed ederim deyû tarîk-i âm olduğunu inkâr etmeğin mahalle-i mezbûreye karîb Sâlih Paşa mahallesi ahâlîsinden el-Hâc Cafer b. Abdullah ve Ahmed Efendi b. Mustafa ve Yunus Beşe b. Hızır ve Ömer Beşe b. Receb ve el-Hâc Eyüb b. Ahmed ve el-Hâc İbrahim b. Ali nâm kimesnelerden vâki‘ü’l-hâl istihbâr olundukda fi’l-vâki‘ işbu İsmail Çelebi tasarrufunda olan menzilin zikr olunan tarîk-i âma açılan kapı kurbunda mârrü’z-zikr kapı dibi ile mezbûr Muslu Beşe’nin kârgîr duvarı dibinden Sâlih Paşa mahallesine varınca kadîmden bu âna gelince âmme-i nâs mürûr ede geldiği tarîk-i âmdır deyû mezbûrun her biri haber vermeğin, vâki‘ hâli Mevlânâ-yı mezbûr mahallinde tahrîr, ba‘dehû meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’s-sâlis min Cemâziyelâhir li sene selâse ve seb‘în ve elf.


Şuhûdü’l-hâl: Abdi b. Hüseyin, İbrahim b. Mehmed, Hasan b. Bayram, Mehmed b. Ramazan.