|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 198 Hüküm no: 163 Orijinal metin no: [13b-8] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Câmeşûyân kethüdâlığına Murad b. Süleyman’ın tayin edildiği
Câmeşûyân kethüdâlığı Mahmiye-i İstanbul’da câmeşûy tâifesinin şeyhleri Süleyman Dede b. Şâhin ve yiğidbaşıları Mehmed b. Bayram ve tâife-i mezbûreden Ahmed b. Pîrî ve el-Hâc Mustafa b. Abdullah ve Ali b. İbrahim ve Mehmed b. Maden ve Mehmed b. Hasan ve İbrahim b. Kasım ve Hasan b. Maden ve el-Hâc Ali ve Uzun Hasan b. Mehmed ve Ahmed b. Şaban ve [14a] Dülgerci Ali ve Hüseyin nâm kimesneler meclis-i şer‘-i hatîrde her biri takrîr-i kelâm ve tebyîn-i merâm edip kethüdâmız İsâ fevt olup mu‘tâd üzre beynimizde kethüdâ ta‘yîn olunmak mühim olup işbu hâzır bi’l-meclis Murad b. Süleyman cümlemizin ihtiyârı ve kethüdâlık hizmetinin uhdesinden gelmeğe ikdârı olmağın mezbûr Murad tâife-i mezbûreye kethüdâ nasb ve ta‘yîn olunmak matlûbumuzdur dediklerinde, mezbûr Murad kethüdâ ta‘yîn olunup ol dahi kethüdâlığı kabûl ve merâsimin edâya ta‘ahhüd etmeğin işbu hurûf mezbûrlar talebiyle ketb olunup yedlerine def‘ ve teslîm olundu. Fi’l-yevmi’s-sâmin aşer min Şevvâli’l-mükerrem sene 1073.
Şuhûdü’l-hâl: Şükrullah b. Mustafa, Abdi Çelebi b. Hüseyin, el-Hâc Ahmed b. Mahmud, Baba Resûl b. Rıdvan.
|