|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 199 Hüküm no: 165 Orijinal metin no: [14a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ayşe Hâtun bt. Şeyh Mehmed Efendi’nin vakıf menziline Rukiyye bt. Abdullah’ı vasî tayin ettiği
Vasiyyet Mahmiye-i İstanbul’da Harâccı Muhyiddin mahallesi sâkinelerinden Ayşe Hâtun bt. Şeyh Mehmed Efendi meclis-i şer‘-i şerîf-i şâmihu’l-imâdda takrîr-i kelâm edip işbu dâr-ı fenâ bî-sebât ve bî-bekā olup ni‘met-i zıl zâil ve mukīmi dayf-ı râhil olduğunu mülâhaza, ve mâ tukaddimû li enfüsiküm min hayrin tecidûhu ındillâhi, âyet-i kerîmesinin ma‘nâ-yı latîfî dahi ma‘lûmum olmağın ba‘zı hıdemât-ı mebrûre inşâsına niyet ve müzâfen ilâ mâ ba‘de’l-mevt şöyle vasiyyet eyledim ki bi emrillâhi te‘âlâ fevt olduğumda, mahmiye-i mezbûrede Kumkapı kurbunda Sarrac İshak mahallesinde vâki‘ iki tarafı Rıdvan Ağa mülkü ve bir tarafı Arakil nâm Ermeni mülkü ve bir tarafı tarîk-i âm ile mahdûd bir bâb tahtânî ve bir bâb fevkānî odaları ve bi’r-i mâyı müştemil menzilim vakf-ı sahîh ile vakf olup evvelâ atîkam Rukiyye bt. Abdullah sâkine ola, vefâtından sonra mezbûre Rukiyye’nin evlâdı ve evlâd-ı evlâdı ve evlâd-ı evlâd-ı evlâdın batnen ba‘de batnin sâkin olalar ba‘de’l-inkırâz ulemâdan meskene muhtâc bir sâlih kimesne sâkin olup mukābelesinde rûhum için beher gün üç İhlâs bir Fâtiha-i şerîfe tilâvet eyle[ye] deyû şart eyleyip bu vasiyyetimi tenfîz için işbu Rukiyye bt. Abdullah nâm hâtunu vasiyy-i muhtâr nasb ve ihtiyâr eyledim, mezbûre Rukiyye dahi kabûl etmeğin mâ hüve’l-vâki‘ mezbûre Ayşe talebiyle ketb olundu. Hurrire fi’l-yevmi’s-sâmin aşer min Şevvâli’l-mükerrem li sene selâse ve seb‘în ve elf.
Şuhûdü’l-hâl: Mustafa Çavuş b. Hüseyin Çavuş, Abdülkādir Efendi el-kadı, el-Hâc İshak el-Kâtib, Abdurrahman Çelebi el-Cündî Mehmed b. Mustafa, Ahmed b. Bayram, Mehmed Halîfe, el-Hâc Ahmed b. Mahmud, Abdi Çelebi b. Hüseyin, Şükrullah b. Mustafa.
|