|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 199 Hüküm no: 164 Orijinal metin no: [14a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Çelebi b. Osman’ın menzilini Naime bt. Mehmed’e sattığı
Mülknâme Mahmiye-i İstanbul’da Yenibahçe kurbunda Karabaş mahallesi ahâlîsinden Mehmed Çelebi b. Osman nâm kimesne meclis-i şer‘-i hatîr-i lâzımü’t-tevkīrde hâfızatü’l-kitâb Nâime bt. Mehmed nâm hâtun mahzarında tav‘an ikrâr ve i‘tirâf edip mahalle-i merkūmede vâki‘ bir cânibi Hâfız Ahmed Paşa bostanı ve bir cânibi Şahbaz bt. Abdullah mülkü ve bir cânibi Ahmed Bey b. Hüseyin mülkü ve bir cânibi tarîk-i âm ile mahdûd ve mümtâz iki bâb tahtânî odaları ve önünde bir sofayı ve bir matbahı ve bir kenîfi ve cüneyneyi müştemil mülk menzilimi tevâbi‘ ve levâhıkı ile merkūme Nâime Hâtun’a otuz bin fıddî râyic fi’l-vakt akçeye tarafeynden îcâb ve kabûlü hâvî bey‘-i kat‘î ile bey‘ ve teslîm mezbûr Nâime Hâtun dahi minvâl-i muharrer üzre iştirâ ve tesellüm edip semeni olan otuz bin akçeyi merkūme yedinden bi’t-tamâm ve’l-kemâl alıp kabz eyledim min ba‘d menzil-i mezbûr Nâime Hâtun’un mülk-i müşterâsı olup keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’l-ışrîn min Şevvâli’l-mükerrem sene 1073.
Şuhûdü’l-hâl: Hasan Efendi b. Mustafa el-İmâm, Abdullah Çelebi b. Ramazan el-Müezzin, Fazlı Çelebi b. Abdullah el-Kayyım, Mustafa Çelebi bevvâb-ı sultânî, Ahmed Beşe b. Abdullah, Yahya Çelebi b. Receb, Yusuf b. Abdullah, Mehmed Çelebi b. Hızır, Mehmed b. Ahmed, sarrâc Mehmed b. Hüseyin, Mehmed b. Mustafa, Mehmed Çelebi b. Mustafa.
|