.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 202
Hüküm no: 169
Orijinal metin no: [14a-6]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mustafa b. Hanefi’nin menzilini bey‘ bi’l-istiğlâl yoluyla Mehmed Çelebi b. Mustafa’ya sattığı

İstiğlâl Mahmiye-i İstanbul’da Hatîce Sultan mahallesinde sâkin Mustafa b. Hanefî mahfil-i kazâda, mahmiye-i mezbûrede Keçeci Pîrî mahallesi avârızına mevkūfe nukūdun mütevellîsi olan bâ‘isü’l-kitâb Mehmed Çelebi b. Mustafa mahzarında ikrâr ve takrîr-i kelâm edip mahalle-i mezbûrede vâki‘ bir tarafı Mehmed Çelebi mülkü ve iki tarafı Mahmud Çelebi mülkü ve bir tarafı tarîk-i âm ile mahdûd büyût-ı adîdeyi müştemil mülk menzilimi bi tarîki’l-istiğlâl mütevellî-i merkūm Mehmed Çelebi’ye yüz esedî guruşa bey‘ ve teslîm ol dahi mâl-ı vakf-ı mezbûr ile iştirâ ve kabûl ve tesellüm eyledikden sonra menzil-i mahdûd-ı mezbûru ba‘de’t-tahliyyeti’ş-şer‘iyye ve’t-takābuzi’l-mer‘î târih-i kitâbdan bir sene tamâmına dek mütevellî-i merkūm Mehmed Çelebi on beş esedî guruşa bana îcâr ve teslîm ben dahi vech-i muharrer üzre iştirâ ve tesellüm eyledim dedikde gıbbe’t-tasdîk mukırr-ı mezbûru vâlidesi Hibetullah nâm hâtun mütevellî-i merkūm muvâcehesinde ikrâr ve takrîr-i kelâm edip menzil-i mezbûr-ı mahdûdun derkine ve ücret-i lâzımesine tarafeynin îcâb ve kabûlü hâvî kefâlet-i sahîha ile kefîl oldum dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-hâdi’l-ışrîn min [şehri] Şevvâli’l-mükerrem sene 1073.


Şuhûdü’l-hâl: Mehmed b. Halil el-İmâm, Mehmed b. Mustafa el-İmâm, el-Hâc Ahmed Beşe el-Müezzin, Ali b. Halil, Receb b. Mehmed, Mehmed b. Ramazan ve gayruhüm.