.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 202
Hüküm no: 170
Orijinal metin no: [14b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Liyo v. Kalayodi’nin arsasını Hıristodoli v. Misail’e sattığı

Mülknâme Mahmiye-i İstanbul’da kuyumcu tâifesinden Liyo v. Kalayodi nâm Ermeni meclis-i şer‘-i hatîr-i lâzımü’t-tevkīrde hâmilü’l-kitâb Hıristodoli v. Misâil [Mikail?] nâm zimmî muvâcehesinde tav‘an ikrâr ve takrîr-i kelâm edip mahmiye-i İstanbul’da Muhsine Hâtun mahallesinde vâki‘ bir tarafı Kürkçübaşı vakfı ve bir tarafı kilise cidârı ve iki tarafı tarîk-i âm ile mahdûd ve mümtâz ve bi’r-i mâyı müştemil olup tûlen sekiz ve arzen altı bi hesâb-ı şatrancî kırk sekiz zirâ‘ mülk arsa-i hâliyemi mezbûr Hıristodoli nâm zimmîye on beş bin akçeye tarafeynden îcâb ve kabûlü hâvî bey‘-i kat‘î ile bey‘ ve teslîm ol dahi minvâl-i muharrer üzre iştirâ ve tesellüm eyledikden sonra semeni olan on beş bin akçeyi mezbûr zimmî yedinden tamâmen alıp kabz eyledim min ba‘d arsa-i mezkûre merkūmun mülk-i müşterâsı olup mutasarrıf olsun dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’l-ışrîn min Şevvâli’l-mükerrem sene 1073.


Şuhûdü’l-hâl: Ahmed Çelebi b. Mahmud kethüdâ-yı muhzırân, Mustafa Çelebi el-Muhzır, Çorbacı Mustafa Beşe, Zülfikār b. Abdullah, Baba Resûl el-Muhzır, Osman Çelebi b. Abdullah el-Muhzır, Abdi Çelebi b. Hüseyin, Adam v. Yordan, Basil v. Panayot, Mevasdos v. Yakob, Dovizu v. Efteyka, Andriye v. Save.