.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 203
Hüküm no: 171
Orijinal metin no: [14b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Abdurrahman Çelebi b. Mustafa’nın gözüne ok ile vuran Mehmed Çelebi’nin gerekli parayı ödemesiyle sulh oldukları

Sulh ve ibrâ Mahmiye-i İstanbul’da Çukurçeşme kurbunda Ahaveyn mahallesinde sâkin Mehmed Çelebi tarafından husûs-ı âti’z-zikre vekîl olup Mehmed Efendi b. Mustafa ve Mehmed Beşe b. Musa şehâdetleri ile vekâleti sâbite olan babası Mahmud Çelebi b. Mustafa nâm kimesne meclis-i şer‘-i hatîr-i lâzımü’t-tevkīrde hâmilü’l-kitâb Abdurrahman Çelebi b. Mustafa nâm kimesne mahzarında bi’l-vekâle ikrâr ve takrîr-i kelâm edip târih-i kitâbdan on üç gün mukaddem beyne’s-salâteyn Okmeydanı’nda mezbûr Abdurrahman Çelebi müvekkilim mezbûr Mehmed Çelebi ile ok atıştıklarında, müvekkilim mezbûrun sol gözün ok ile vurup mecrûh etmeğin mûcebini merkūm Abdurrahman Çelebi’den da‘vâ eylediğinde, mezbûr Abdurrahman Çelebi inkâr edip müvekkilim mezbûr Mehmed Çelebi dahi müdde‘âsını isbâta kādir olmayıp merkūm Abdurrahman Çelebi’ye yemîn vermek sadedinde iken vesâtat-ı muslihîn ile merkūm Abdurrahman Çelebi müvekkil-i mezbûr Mehmed Çelebi ile da‘vâ-yı merkūmeden an inkâr dört bin beş yüz akçe üzerine sulh olup mezbûr Mehmed Çelebi dahi sulh-ı mezbûru kabûl ve bedel-i sulh olan meblağ-ı mezbûr dört bin beş yüz akçeyi bi’t-tamâm yedinden alıp kabz edip cerh-i mezbûrun mûcebini da‘vâdan ve ol cerhden hâdis olacak şeyden mezbûr Abdurrahman Çelebi’nin zimmetini ibrâ-i âm-ı kātı‘ü’n-nizâ‘ ile ibrâ eyledim dedikde gıbbe’t-tasdîk mâ vaka‘a bi’l-ibtigā ketb ve imlâ olundu. Fi’l-yevmi’l-ışrîn min Şevvâli’l-mükerrem li sene selâse ve seb‘în ve elf.


Şuhûdü’l-hâl: Mehmed Efendi b. Mustafa, Ömer Efendi el-mukayyid, Kefeli el-Hâc Mehmed, Ali Efendi b. Mehmed imâm-ı mahalle-i merkūme, İbrahim Çelebi b. Abdullah, Mehmed Çelebi b. Abdurrahman, Ahmed Çelebi b. Mahmud kethüdâ-yı muhzırân, İbrahim Çelebi b. Mustafa, Çorbacı Mustafa Beşe es-Sarrâc, el-Hâc Ebûbekir Beşe b. Ahmed, çukadar Ali Beşe, Osman Çelebi b. Abdullah el-Muhzır, Abdi Çelebi el-Muhzır, Baba Resûl el-Muhzır, el-Hâc Ramazan Çelebi b. Hasan es-Sâ‘atî.