.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 204
Hüküm no: 173
Orijinal metin no: [14b-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mehmed Efendi b. Ahmed’in zeytin ağaçlarını El-Hâc Ahmed Ağa b. Yusuf Çavuş’a sattığı

Mülknâme-i eşcâr-ı zeytin Mahmiye-i İstanbul’da Çerağî Hamza mahallesinde misâfiren sâkin fahrü’l-müderrisîni’l-kirâm Mehmed Efendi b. Ahmed meclis-i şer‘-i hatîr-i lâzımü’t-tevkīrde fahrü’l-emâcid ve’l-ekârim hâfızü’l-kitâb el-Hâc Ahmed Ağa b. Yusuf Çavuş mahzarında ikrâr ve takrîr-i kelâm edip medîne-i İzmir müzâfâtından Yakacık nâm mahalde vâki‘ bir cânibi Küçük Ali veresesi bahçesine ve bir cânibi Su kuyusu vakfına ve bir cânibi Bölükbaşı oğlu el-Hâc Mehmed Efendi tarlasına ve bir cânibi tarîk-i âma müntehî olup el-Hâc Mehmed nâm kimesnenin tasarrufunda olan tarla üzerinde hâlâ adedi beynimizde ilm-i şer‘î ile ma‘lûm mülk zeytin eşcârımı müşârün-ileyh el-Hâc Ahmed Ağa’ya üç yüz esedî guruşa tarafeynden îcâb ve kabûlü hâvî bâtten bey‘ ol dahi minvâl-i muharrer üzre iştirâ ve kabûl eyledikden sonra semeni olan üç yüz esedî guruşu müşârün-ileyh Ahmed Ağa yedinden tamâmen alıp kabz edip ol eşcârı mahallinde tesellüm ve zabta müşârün-ileyhi taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Şevvâli’l-mükerrem li sene selâse ve seb‘în ve elf.


Şuhûdü’l-hâl: Es-Seyyid Hasan Çelebi kāimmakām-ı nakībü’l-eşrâf, Yusuf Çelebi b. Mehmed, el-Hâc Hüseyin Çelebi b. Mahmud, el-Hâc İbrahim Çelebi b. Ömer, Ali Beşe b. Abdullah er-Râcil, Mehmed Çelebi b. Mehmed, Veli Bey b. Ali, Mehmed Çelebi b. Ahmed, Musa b. ( ), Keşfî Mustafa Efendi el-Kâtib, Kâtibü’l-vesîka Hüseyin Efendi reis-i küttâb-ı mahkeme, Ahmed Çelebi b. Mahmud kethüdâ-yı muhzırân, Abdi Çelebi b. Hüseyin el-Muhzır, Şükrullah Bey b. Mustafa.