.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 205
Hüküm no: 174
Orijinal metin no: [14b-5]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hatice bt. el-Hâc Mehmed’in Kurt b. Süleyman’dan muhâlaa yoluyla boşandığı

Hul‘ Mahmiye-i İstanbul’da Çukur mahallede sâkine Hatîce bt. el-Hâc Mehmed nâm hâtun tarafından zikri âtî hul‘ı ikrâra vekîl olup mezbûrenin zâtını ma‘rifet-i şer‘iyye ile ârifân İmâm Hüseyin Efendi b. Abdülfettah ve Müezzin Receb Efendi b. Hüsam şehâdetleri ile şer‘an vekâleti sâbite olan babası mezbûr el-Hâc Mehmed b. Selim meclis-i şer‘-i hatîr-i lâzımü’t-tevkīrde mezbûrenin zevc-i mutallıkı Kurt b. Süleyman mahzarında bi’l-vekâle ikrâr ve takrîr-i kelâm edip kızım müvekkilem mezbûrenin zevci mezbûr Kurt zimmetinde mütekarrir ve ma‘kūdun-aleyh olan altı bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre, muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra mezbûrun zimmetine lâzım gelen yirmi riyâlî guruş nafaka-i mefrûza-i müstedânemden ve zevciyyete müte‘allika olan da‘vâdan mezbûrun zimmetini ibrâ-i âmm-ı kātı‘ü’n-nizâ‘ ile ibrâ eylediğimden sonra mezbûrun firâşından hâsıl Mustafa nâm sagīr dahi yedi yaşına bâliğ olunca kendi malımdan infâk ve iksâya ta‘ahhüd eyledim dedi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ aşer min [şehri] Şevvâli’l-mükerrem li sene selâse ve seb‘în ve elf.


Şuhûdü’l-hâl: Mehmed Çelebi b. Rıdvan, Ahmed Efendi b. Hüseyin el-İmâm, Ömer b. Mustafa, Mustafa b. Mehmed, İbrahim b. Ali, Abdi Çelebi el-Muhzır, Baba Resûl.