|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 206 Hüküm no: 176 Orijinal metin no: [15a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Züleyha Hâtun bt. Sinan’ın anası ve babası gibi hür olduğu
İsbât-ı hürriyet Râfi‘atü’l-kitâb Züleyhâ Hâtun bt. Sinan meclis-i şer‘-i hatîrde kendiye rakīk olmak üzre vaz‘-ı yed eden zahrü’l-kuzât İbrahim Efendi b. Selim muvâcehesinde takrîr-i da‘vâ edip ben vilâyet-i Rumeli’nde Yanya sancağında nefs-i Kontecse’de? sâkin Sinan nâm hürrü’l-aslin sulbiye kızı ve Sâliha nâm hürretü’l-asıldan mütevellîde olup babam mezbûr Sinan ve vâlidem merkūme Sâliha olup aslâ ebeveynime rık târî olmamış iken, mezbûr İbrahim Efendi bana mâlikâne vaz‘-ı yed eder suâl olunup kasr-ı yedine tenbîh olunmak matlûbumdur dedikde gıbbe’s-suâl merkūm İbrahim Efendi cevâbında müdde‘iyye-i mezbûreyi târih-i kitâbdan on ay mukaddem medîne-i Selânik’de Esirci Mehmed nâm kimesneden yüz on guruş kıymetli bir re’s câriye ile on beş riyâlî guruşa iştirâ eyledim. Vech-i muharrer üzre hürretü’l-asl olduğu ma‘lûmum değildir deyû inkâr edicek müdde‘iyye-i mezbûre Züleyhâ’dan da‘vâsını mübeyyine beyyine taleb olundukda zikr olunan Kontecse’den olup mahmiye-i İstanbul’da Suhte Sinan mahallesi sükkânından udûl-i ricâlden Mustafa b. Mehmed ve Hüseyin b. Ali ve bostancılardan Süleyman b. Mehmed ve Sinan b. Arslan nâm kimesneler li ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ müdde‘iyye-i mezbûre Züleyhâ Hâtun zikr olunan Kontecse’de sâkin Sinan nâm hürrü’l-aslin sulbiye kızı Sâliha nâm hürretü’l-asıldan mütevellîde olup babası merkūm Sinan ve anası mezbûre Sâliha olup aslâ ebeveyne rık târî olmamıştır. Müdde‘iyye-i mezbûre hürretü’l-asl olduğuna biz şâhidiz, şehâdet dahi ederiz deyû her biri edâ-i şehâdet-i şer‘iyye ettiklerinde, ba‘de’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükm müdde‘iyye-i mezbûreden kasr-ı yedine mezbûra tenbîh birle mâ vaka‘a bi’t-taleb ketb olundu. Fi’l-yevmi’t-tâsi‘ aşer min Şevvâli’l-mükerrem li sene selâse ve seb‘în ve elf.
Şuhûdü’l-hâl: Zahrü’l-a‘yân Mehmed Ağa Muhtesib Ağası, Mehmed Çelebi b. Ömer, İbrahim Çavuş b. Kalender, el-Hâc Sinan b. Mehmed, el-Hâc Ahmed b. Mahmud.
|