.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 205
Hüküm no: 175
Orijinal metin no: [14b-6]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yahya Efendi’nin vârislerinin vasîsi olan Emine bt. Mustafa Ağa’nın vasîliği vekil tayin edilen Ahmed Efendi b. Mustafa Ağa’ya devrettiği

Vesâyetten ferâğ Husûs-ı âti’l-beyânı mahallinde tahrîr için gıbbe’l-iltimâs kıbel-i şer‘-i mutahhardan Mevlânâ Keşfî Mustafa Efendi irsâl olunup ol dahi mahmiye-i İstanbul’da Harâccı Muhyiddin mahallesinde mefharü kuzâti’l-İslâm Mehmed Mukīm Efendi’nin sâkin olduğu menziline varıp zeyl-i rakīmde muharrerü’l-esâmî olan müslimîn huzûrunda akd-i meclis-i şer‘-i şerîf eyledikde cezîre-i İstanköy sükkânından Davud Efendi b. Mehmed meclis-i ma‘kūd-ı mezbûrda cezîre-i Rodos sükkânından olup bundan akdem vefât eden Yahya Efendi’nin verâseti zevce-i metrûkesi Emine bt. Mustafa Ağa nâm hâtun ve sulbî sagīr oğulları Ahmed Çelebi ve Sâlih Çelebi ve sulbiye sagīre kızları Nesli ve Emetullah’a münhasıra olduğu şer‘an zâhir ve müte‘ayyin oldukdan sonra sıgār-ı mezbûrûnun vâlideleri ve tesviye-i umûrlarına kıbel-i şer‘den mansûbe vasîleri olan merkūme Emine Hâtun tarafından husûs-ı âti’z-zikre vekîl-i müsecceli olan karındaşı mefharü’l-müderrisîni’l-kirâm bâ‘isü hâze’l-kitâb Ahmed Efendi b. [15a] Mustafa Ağa mahzarında ikrâr ve takrîr-i kelâm edip müteveffâ-yı merkūm Yahya Efendi’nin mahmiye-i mezbûrede Bezzâzistân-ı cedîdde ma‘rifet-i şer‘le emânet vaz‘ olunan eşyâsını ve sâir kimesneler zimmetinde olan terekesini hıfz ve tahsîl için taraf-ı şer‘den beni vasî nasb ve ta‘yîn eylemişler idi hâlâ ben vesâyet-i merkūme uhdesinden gelmeğe kādir olmamağla, bir şeye müdâhale etmeyip müteveffâ-yı mezbûrun mahmiye-i mezbûrede olan terekesini yerli yerinden vasiyy-i mezbûrun vekîli mûmâ-ileyh Ahmed Efendi’ye gösterip vesâyet-i mezbûreden kasr-ı yed eyledim dedikde gıbbe’t-tasdîki’ş-şer‘î vâki‘ hâli Mevlânâ-yı mezbûr mahallinde tahrîr, ba‘dehû ma‘an irsâl olunan Mehmed b. Ramazan ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâbi‘ aşer min Şevvâli’l-mükerrem sene 1073.


Şuhûdü’l-hâl: Mefharü kuzâti’l-İslâm Mehmed Mukīm Efendi b. Ahmed Efendi el-kadı bi Siroz sâbıkan, Mefharü’l-a‘yân Abdülbâkī Efendi kâtib-i fodla sâbıkan, Abdülvehhab Efendi b. Ziyaeddin el-kadı, Ahmed Efendi b. Ali Efendi el-kadı, Mehmed Efendi b. Ali Efendi el-kadı, es-Seyyid Mehmed Efendi b. es-Seyyid İbrahim Efendi, Abdülbâkī Efendi b. Musa, Abdurrahman Efendi b. Mehmed Mukīm Efendi, el-Hâc Hızır b. Ali, Ali Beşe b. Ali, sarrâc Halil Çelebi b. Hüseyin.