|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 208 Hüküm no: 178 Orijinal metin no: [15a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ali Çelebi b. Sefer’in cariyesi Çerkez asıllı Nazenin bt. Abdullah’ın efendisi tarafından tedbîren azat edildiği
İsbât-ı tedbîr Mahmiye-i İstanbul’da Tercüman Yunus mahallesi sükkânından Ayşe Hâtun bt. Mehmed Efendi meclis-i şer‘-i hatîrde zevci râfi‘ü’l-kitâb Ali Çelebi b. Sefer muvâcehesinde üzerine da‘vâ edip zevcim mezbûr Ali Çelebi yedinde olan hâzıre bi’l-meclis orta boylu açık kaşlı Çerkesiyyetü’l-asl Nâzenin bt. Abdullah nâm câriyesini târih-i kitâbdan dört sene mukaddem bana hibe ve temlîk edip ben dahi ittihâb ve temellük edip mülküm olmuş iken, merkūm Ali Çelebi zabtıma mâni‘ olur suâl olunsun dedikde gıbbe’s-suâl merkūm Ali Çelebi cevâbında işbu câriye-i mezbûreyi kable’l-hibe târih-i kitâbdan dört buçuk sene mukaddem tedbîr-i mutlak ile tedbîr eyledim câriye-i mezbûre müdebberedir deyicek gıbbe’l-istintâk ve’l-inkâr mezbûr Ali Çelebi’den takrîr-i meşrûhuna mutâbıka beyyine taleb olundukda mahmiye-i mezbûrede Enserci mahallesi ahâlîsinden Ahmed Beşe b. Şaban ve Mehmed b. el-Hâc Veli ve Hızır Beşe b. Ahmed nâm kimesneler li ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ mezbûr Ali Çelebi işbu câriyesini târih-i kitâbdan dört buçuk sene mukaddem tedbîr-i mutlak ile huzûrumuzda tedbîr eyledi. Elân merkūme Nâzenin müdebberedir. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a oldukdan sonra mezbûre Ayşe Hâtun bî-vech da‘vâdan men‘ birle mâ hüve’l-vâki‘ bi’l-ibtigā ketb olundu. Fi’l-yevmi’s-sâmin aşer min Şevvâli’l-mükerrem sene 1073.
Şuhûdü’l-hâl: Ahmed Beşe el-Mübâşir, es-Seyyid İbrahim Çelebi es-Seyyid Ali, İsmail Çelebi b. Mehmed, çukadar Ali Beşe, es-Seyyid Mehmed b. es-Seyyid Ali, el-Hâc Ahmed b. Mahmud, Ahmed Çelebi b. Ali ed-Dâ‘î, Şükrullah b. Mustafa.
|