|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 214 Hüküm no: 188 Orijinal metin no: [16a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Fâtıma Hâtun’un vakıf arsasını mukâtaa yoluyla kiralayan Abdurrahman Efendi b. İbrahim’in istihkâm hücceti talebi
Temessük mûcebince istihkâm hücceti Mahmiye-i İstanbul’da Karababa mahallesi ahâlîsinden hâfızü’l-kitâb Abdurrahman Efendi b. İbrahim meclis-i şer‘-i hatîr-i lâzımü’t-tevkīrde takrîr-i kelâm edip mahalle-i merkūmede sâkine olup mukaddemâ vefât eden Fâtıma Hâtun nâm sâhibetü’l-hayrın gallesini mahalle-i merkūmede Ali Paşa-yı Atîk câmi‘-i şerîfi’nde imâm olanlara meşrût vakfı olup mahalle-i mezkûrede vâki‘ lede’l-ahâlî ma‘lûmü’l-hudûd olan menzil bin altmış iki senesinde olan harîkde muhterik olup arsa-i sırfa kalıp cânib-i vakıfda binâya müsâ‘ade ve meşrûtun-lehüm olanlarda binâya kudret olmayıp mürûr-ı eyyâm ile arsa-i mezkûre mezbele olup vakfa küllî gadr olmağla sâhib-i vukūf müslimîn ile arsa-i mezkûrenin üzerine varılıp, zeylinin ihrâcı tahmîn-i sahîh ile sekiz bin akçeye tahmîn olundukdan sonra, meblağ-ı mezbûr mu‘accelesine mahsûb olup ihdâs edeceğim binâ kendi mülküm olmak üzre menzil-i mezbûrun hasbî mütevellîsi Mehmed Çelebi b. Ali icâre-i mu‘accele ve yevmî bir akçe ücret-i müeccele ile bana îcâr ve teslîm ve ben dahi vech-i muharrer üzre istîcâr ve tesellüm edip yedime îcâr ve iznini hâvî temessük vermiş idi hâlâ ol temessüke nazar olunup mûcebince istihkâmen yedime hüccet verilmek taleb ederim deyû mazmûnu takrîr-i meşrûhınu nâtık ve mütevellî-i mezbûrun imzâ ve hâtemini hâvî temessük ibrâz edip nazar olundukdan sonra mûcebince işbu hurûf li ecli’l-istihkâm ketb olunup yed-i tâlibe def‘ olundu. Fi’l-yevmi’s-sânî ve’l-ışrîn min Şevvâli’l-mükerrem sene 1073.
Şuhûdü’l-hâl: Ali Ağa b. İsmail, İbrahim Çavuş, Hacı Receb bevvâb-ı sultânî, Hasan Beşe b. Abdullah, Mehmed Çavuş, Bayram Beşe, Kundakçı Mehmed Çelebi, Zerreci Mehmed Çelebi, Celasin Ahmed Çelebi, Mustafa Çelebi b. Süleyman, Ebûbekir Çelebi b. Abdullah, İslâm b. Abdullah Kilârî, Abdi Çelebi el-Muhzır, Şükür Beşe el-Muhzır.
|