|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 213 Hüküm no: 187 Orijinal metin no: [16a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ayşe bt. el-Hâc Hasan’ın Hoca Muhyiddin vakfından kiraladığı menzilin yanmasıyla yerine bina ettiği oda kirasının düşürüldüğü
Tenzîl-i ücret-i müeccele Mahmiye-i İstanbul’da Hatîb Muhyiddin mahallesi sâkinelerinden Ayşe bt. el-Hâc Hasan nâm hâtun meclis-i şer‘-i şerîf-i lâzımü’t-teşrîfde takrîr-i kelâm edip Hoca Muhyiddin vakfından olup mahmiye-i mezbûrede vâki‘ iki tarafdan vakf-ı mezbûr ve bir tarafdan Hacı Harîmîoğlu tasarrufunda olan vakıf menzil ve bir tarafdan tarîk-i hâs ile mahdûd olan bir bâb tahtânî vakıf menzil icâre-i mu‘accele ve ayda otuz akçe ücret-i müeccele ile tasarrufumda iken harîk-iazîmde muhterik olup arsa-i sırfa kalıp kendi malımla arsa-i mezbûre üzerine bir bâb oda binâ etmiş idim. Lâkin ayda otuz akçe ücret-i müeccele ecr-i mislinden zâyidedir, üzerine varılıp ecr-i misli tahmîn-i sahîh ile tahmîn olunmak matlûbumdur dedikde cânib-i şer‘den Mevlânâ Sofu Mehmed Efendi irsâl olunup ol dahi Hâssa mi‘mârlardan üstâd Ali b. Abdullah ile ve sikāt-ı sahîhi’l-kelimâtdan Mustafa Çelebi b. Fethullah el-Müezzin ve Mehmed Çelebi b. Yusuf ve el-Hâc Mustafa b. Müstehab ve Hüseyin b. Mustafa ve Mustafa b. Mehmed ve Hüseyin b. Ali ve Mehmed b. Receb ve Şaban b. Mustafa nâm kimesneler ile zikr olunan vakıf odanın üzerine varıp tahmîn ettiklerinde, zikr olunan odanın ayda ecr-i misli ancak yirmi altı akçe[dir] deyû mütevellî-i vakıf olan Mehmed Çelebi b. Hasan muvâcehesinde her biri hakīkat-i hâli haber vermeğin, vâki‘ hâli Mevlânâ-yı mezbûr mahallinde tahrîr, ba‘dehû ma‘an irsâl olunan Yusuf Çavuş b. Abdullah ile meclis-i şer‘-i hatîre gelip inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn aşer min Şevvâli’l-mükerrem sene 1073.
Şuhûdü’l-hâl: El-Hâc Ahmed b. Mahmud kethüdâ-yı muhzırân, Abdi Çelebi b. Hüseyin, Şükrullah Bey b. Mustafa, Baba Resûl b. Rıdvan.
|