.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 216
Hüküm no: 191
Orijinal metin no: [16b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Nazenin bt. Abdullah’ın Cabî Mustafa Beşe b. Resûl’den alacak davasının menedildiği

Yemîn Mahmiye-i İstanbul’da Çıkrıkçı Kemal mahallesinde sâkine Nâzenin bt. Abdullah nâm hâtun meclis-i şer‘-i hatîr-i lâzımü’t-tevkīrde mahmiye-i mezbûrede Yahnikapan mahallesi sükkânından Câbi Mustafa Beşe b. Resûl nâm kimesne mahzarında üzerine da‘vâ ve takrîr-i kelâm edip mukaddemâ mezbûr Mustafa Beşe’ye bi tarîki’l-emâne sekiz bin akçe def‘ ve teslîm edip ol dahi yedimden ahz u kabz etmiş idi. Meblağ-ı mezbûr sekiz bin akçeden beş bin akçesini mezbûr Câbi Mustafa Beşe yedinden ahz u kabz edip meblağ-ı bâkī üç bin akçe zimmetinde kalmışdır hâlâ suâl olunup alıverilmesi matlûbumdur dedikde gıbbe’s-suâl ve’l-inkâr müdde‘iyye-i mezbûreden müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ müdde‘iyye-i mezbûreden bi tarîki’l-emâne sekiz bin akçe alıp meblağ-ı mezbûrdan üç bin akçesi zimmetinde bâkī kalmadığına mezbûr Câbi Mustafa Beşe’ye yemîn teklîf olundukda ol dahi alâ vefki’l-mes’ûl half billâhi’l-aliyyi’l-a‘lâ etmeğin müdde‘iyye-i mezbûre bilâ-beyyine mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Şevvâli’l-mükerrem sene 1073.


Şuhûdü’l-hâl: Abdünnebî b. Abdülazîz el-Mübâşir, Mustafa b. Resûl, Mehmed b. Abdülmennân, Yusuf b. Musa, Hasan b. Mustafa, Mehmed b. Mustafa.