|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 216 Hüküm no: 192 Orijinal metin no: [16b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Çelebi b. Kasım Çavuş’un Hasan b. Karanfil’de alacağı kalmadığı
Men‘ Mahmiye-i İstanbul’da Molla Gürânî mahallesinde sâkin iken bundan akdem vefât eden Mehmed Çelebi [b.] Kasım Çavuş’un li ebeveyn karındaşı ve hasren vârisi Ali Çelebi nâm kimesne meclis-i şer‘de Havâss-ı Refî‘a müzâfâtından Terkos nâhiyesine tâbi‘ Yayla nâm karye sükkânından bâ‘isü’l-kitâb Hasan b. Karanfil nâm kimesne mahzarında üzerine da‘vâ edip mûrisim müteveffâ-yı mezbûr hâl-i sıhhatinde mezbûr Hasan’a bi tarîki’l-mudârebe yirmi bin akçe def‘ ve teslîm ol dahi ahz u kabz ettikden sonra, on bin akçesi mukābelesinde üç su sığırı tosunu ile üç Selânik ineğini emr-i mezbûr ile alıp müteveffâ-yı merkūma hâl-i hayâtında teslîm edip bâkī on bin akçesini kable’l-ahz merkūm Mehmed Çelebi vefât etmekle meblağ-ı mezbûr irsen bana intikāl etmişdir hâlâ taleb ederim suâl olunsun dedikde gıbbe’s-suâl mezbûr Hasan cevâbında meblağ-ı mezbûr yirmi bin akçeyi vech-i muharrer üzre müteveffâ-yı mezbûr Mehmed Çelebi yedinden kabzını ikrâr, lâkin meblağ-ı mezbûrun on bin akçesini hâl-i sıhhatinde müteveffâ-yı mezbûra huzûr-ı müslimînde def‘ ve teslîm ve bâkī on bin akçesine zikr olunan üç su sığırı tosunu ile üç Selânik ineğini müteveffâ-yı mezbûr Mehmed Çelebi’ye verip ol dahi âhara bey‘ ve semenlerinden on bin akçesini kendi alıkoyup fâ’ide hâsıla olursa beynimizde taksîm etmek üzre iken merkūm Mehmed Çelebi vefât etmekle zikr olunan üç su sığırı ile üç Selânik ineğini mezbûr Ali Çelebi kabz etmişdir deyû def‘le mukābele edicek gıbbe’l-istintâk ve’l-inkâr mezbûr Hasan’dan def‘-i mezbûrunu mübeyyine beyyine taleb olundukda nâhiye-i mezbûreye tâbi‘ Ayazma nâm karye sükkânından Hasan b. Hamza ve Abdi b. İsâ nâm kimesneler li ecli’ş-şehâde meclis-i şer‘a hâzırân olup istişhâd olunduklarında, fi’l-vâki‘ mezbûr Hasan meblağ-ı mezbûr yirmi bin akçenin on bin akçesini hâl-i sıhhatinde müteveffâ-yı mezbûr Mehmed Çelebi’ye def‘ ve teslîm ve on bin akçesi mukābelesinde zikr olunan üç su sığırı tosunu ile üç Selânik ineğini müteveffâ-yı mezbûr Mehmed Çelebi’ye verip ol dahi âhara bey‘ ve semenlerinden on bin akçesini kendi alıkoyup hâsıl olan fâ’idesini beynlerinde taksîm etmek üzre iken merkūm Mehmed Çelebi vefât etmeğle, ol üç su sığırı ve üç Selânik ineğini mezbûr Ali Çelebi kabz etmişdir, biz bu husûsa şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebince bî-vech mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Şevvâli’l-mükerrem sene 1073.
Şuhûdü’l-hâl: Ali Beşe b. Osman, Mehmed b. Ramazan, Abdi Çelebi [b.] Hüseyin, Hayrullah Beş, Baba Ahmed b. Abdülmennân ve gayruhüm.
|