.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 220
Hüküm no: 197
Orijinal metin no: [17a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


İsmihan bt. Mahmud’un belirtilen eşyalarıyla mehr-i müeccelini kocası Mehmed b. Osman’a hibe ettiği

Hibe Mahmiye-i İstanbul’da Dülgerzâde mahallesinde sâkine İsmihan bt. Mahmud nâm hâtun tarafından husûs-ı âti’l-beyânı ikrâra vekîl olup mezbûrenin zâtını ma‘rifet-i şer‘iyye ile ârifân Mehmed Efendi b. Osman el-imâm ve Ali Efendi b. Mahmud el-Müezzin şehâdetleriyle şer‘an vekâleti sâbite olan el-Hâc Ali b. Abdünnebî nâm kimesne meclis-i şer‘-i şerîf-i lâzımü’t-teşrîfde, müvekkile-i mezbûrenin zevci işbu bâ‘isü’l-kitâb Mehmed b. Osman mahzarında bi’l-vekâle ikrâr ve takrîr-i kelâm edip müvekkilem mezbûre İsmihan silk-i mülkünde münselik eşyâsından üç köhne yemeni yorgan ve beş köhne beledî yastık ve iki köhne beledî döşek ve bir minder ve bir köhne kebe ve bir cedîd kebe ve bir köhne kilim ve bir mâî velense ve bir köhne seccâde ve üç tencere ve iki tepsi ve bir leğen ve bir güğüm ve üç sahan ve bir tas ve bir maşraba ve üç sagīr bakracını mezbûr Mehmed’e hibe ve teslîm ol dahi meclis-i hibede ittihâb ve tesellüm ve kabûl eylediklerinde zevci Mehmed zimmetinde mütekarrir ve ma‘kūdun-aleyh olan bin akçe mehr-i müeccelinin dokuz yüz akçesini dahi mezbûr Mehmed’e hibe-i sahîha-i şer‘iyye ile hibe edip ol dahi meclis-i hibede ittihâb ve kabûl eyledi ba‘de’l-yevm eşyâ-i mezkûre ile meblağ-ı mezbûr merkūm Mehmed’in mülk-i mevhûbudur dedikde mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Şevvâli’l-mükerrem li sene selâse ve seb‘în ve elf.


Şuhûdü’l-hâl: Mehmed Efendi b. Osman el-İmâm, Mahmud Efendi el-İmâm, Hüseyin Beşe el-Müezzin, Süleyman Beşe b. Habîb, Hamza Beşe b. Muslu, Ahmed Çelebi b. Yusuf, el-Hâc Ali b. Abdünnebî, Ahmed Çelebi b. Osman.