.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 221
Hüküm no: 198
Orijinal metin no: [17a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mehmed Çelebi b. Ahmed’in alacaklı olduğu Seyyid Ali Çelebi b. Habîb’in zimmetini ibrâ eylediği

İbrâ Mahrûse-i Galata’ya tâbi‘ kasaba-i Tophâne mahallâtından Tomtom mahallesinde sâkin Mehmed Çelebi b. Ahmed meclis-i şer‘-i hatîrde râfi‘ü’l-kitâb es-Seyyid Ali Çelebi b. Habîb muvâcehesinde ikrâr ve i‘tirâf edip mezbûr Seyyid Ali Çelebi mukaddemâ esir oldukda, dört yüz otuz beş riyâlî guruş verip tahlîs ettiğimden sonra işbu Hasan b. Hamza nâm kimesneyi meblağ-ı merkūmu mahmiye-i İstanbul’da mezbûr es-Seyyid Ali Çelebi’den ahz u kabza tarafımdan tevkîl ettiğimde, merkūm Hasan dahi meblağ-ı mezbûrdan yüz yetmiş guruşunu mezbûr Seyyid Ali’den alıp kabz edip mâ‘adâdan mezbûr Seyyid Ali Çelebi’nin zimmetini fuzûlen ibrâ etmekle hâlâ ben dahi vekîl-i mezbûr Hasan’ın vech-i muharrer üzre olan ibrâsını tecvîz eyledim. Meblağ-ı mezbûr dört yüz otuz beş guruşa müte‘allika âmme-i da‘vâdan mezbûr Seyyid Ali’nin zimmetini ibrâ-i âm-ı kātı‘ü’n-nizâ‘ ile ibrâ ve iskāt eyledim. Fîmâ ba‘d husûs-ı mezbûra müte‘allika mezbûr Seyyid Ali Çelebi’nin üzerine da‘vâ ve nizâ‘ ve husûmetim kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Şevvâli’l-mükerrem sene 1073.


Şuhûdü’l-hâl: Es-Seyyid Süleyman b. es-Seyyid İbrahim, es-Seyyid Ali Çelebi b. es-Seyyid Mustafa, Ahmed Çelebi ed-Dâ‘î, Baba Resûl b. Rıdvan.