|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 229 Hüküm no: 209 Orijinal metin no: [18a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
İbrahim Ağa b. Mustafa Ağa’nın Gürcü asıllı kölesi Ali b. Mirza’yı azat ettiği
Itâknâme Mahmiye-i İstanbul’da Topkapısı dâhilinde Bayezid Ağa mahallesinde sâkin mefharü’l-a‘yân İbrahim Ağa b. Mustafa Ağa tarafından i‘tâk-ı âti’z-zikri ikrâra vekîl olup Halil Çelebi b. Mustafa ve Mustafa Bey b. Mehmed şehâdetleriyle şer‘an vekâleti sâbite olan Mustafa Çelebi b. Ahmed meclis-i şer‘-i hatîrde bi’l-vekâle ikrâr ve i‘tirâf edip müvekkilim mûmâ-ileyh İbrahim Ağa işbu orta boylu, açık kaşlı, kara gözlü Gürciyyü’l-asl bâ‘isü’l-vesîka Ali b. Mirza nâm abd-i memlûkünü hasbeten lillâhi te‘âlâ ve taleben li merzâti Rabbihi’l-a‘lâ tahrîr ve i‘tâk ve silk-i ahrâr-ı asliyyîn gibi hür olup üzerinde müvekkil-i mûmâ-ileyh İbrahim Ağa’nın velâdan gayrı hakkı kalmadı dedikde vâki‘ü’l-hâl bi’t-taleb ketb olundu. Fi’l-yevmi’s-sâmin ve’l-ışrîn min Şevvâli’l-mükerrem li sene selâse ve seb‘în ve elf.
Şuhûdü’l-hâl: Es-Seyyid Ebûbekir Ağa b. es-Seyyid Ahmed, Hamza Efendi, Berber Ahmed b. Mehmed, Yusuf Çelebi b. Abdullah, Hasan b. Abdullah, Ömer b. Abdullah, Cafer b. Abdullah.
|