.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 228
Hüküm no: 208
Orijinal metin no: [18a-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Bezzâzistânda Muhsine Hâtun vakfına ait sandıkta çıkan paraların mütevellî Mehmed Efendi b. Sefer’e teslim edildiği

Teslîm-i mâl-ı vakıf ile’l-mütevellî Mahmiye-i İstanbul’da Muhsine Hâtun vakfına hâlâ mütevellî olan Mehmed Efendi b. Sefer meclis-i şer‘-i hatîrde takrîr-i kelâm edip vakf-ı mezbûra mukaddemâ mütevellî olan Abdülbâkī’nin hıyâneti zâhir olmağla ref‘ olundukdan sonra mâl-ı vakıfdan makbûzu olan dokuz yüz yirmi altı guruşu bana teslîm etmeyip ve muhâsebesi görülmeden muhtefî oldukda, mürtezika-i vakf-ı mezbûr ile ahvâli Der-i Devlet’e arz olundukda Bezzâzistân-ı cedîdde emânet olan mâl-ı vakf-ı mezbûr rihânını cânib-i şer‘den varılıp mütevellîsine teslîm oluna deyû yedime buyruldu-i şerîf ihsân olunmuşdur. Cânib-i şer‘den zikr olunan Bezzazistân’a varılıp vakf-ı mezbûrun mevcûd olan nukūd ve rihânı bana teslîm olunmak matlûbumdur deyicek savb-ı şer‘-i mergūbdan Mevlânâ Abdülbâkī Efendi irsâl olunup ol dahi zikr olunan Bezzâzistân’a varıp mürtezika-i vakıfdan zeyl-i kitâbda muharrerü’l-esâmî olan müslimîn ve Bezzâzistân kethüdâsı huzûrunda mâl-ı vakf-ı mezbûr vaz‘ olunan sandık açılıp, mâl-ı vakf-ı mezbûrdan nakid ancak üç yüz yirmi altı riyâl guruş, otuz altısı altışar dirhem mâ‘adâsı yedişer dirhem ve dört şerîfî altın ve dört yüz dokuz guruşun rihânı bulunup zikr olunan nukūd ve rihânı huzûr-ı müslimînde mütevellî-i mezbûra teslîm ol dahi ahz ve tesellüm ettikden sonra vâki‘ hâli Mevlânâ-yı mezbûr mahallinde tahrîr, ba‘dehû meclis-i şer‘a gelip Receb b. Hacı Murad ile inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Şevvâli’l-mükerrem sene 1073.


Şuhûdü’l-hâl: İbrahim Çelebi b. Hacı Hamza kethüdâ, Mustafa Çelebi b. Mehmed, es-Seyyid Ahmed Efendi b. es-Seyyid Hasan el-hatîb, el-Hâc Osman en-nâzır-ı hammâmî, Müezzin Mehmed Halîfe, Halil Çelebi el-hânî, Hüseyin Çelebi el-Müezzin, Sâlih Çelebi, Ahmed b. Musa.