|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 230 Hüküm no: 211 Orijinal metin no: [18b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Raziye bt. Ahmed Efendi’nin menzilini oğlu Mehmed Çelebi b. Ömer’in kızı Rukiyye Hâtun ile oğlu Mustafa’ya hibe ettiği
Hibe Mahmiye-i İstanbul’da Edirnekapısı dâhilinde Ali Paşa-yı atîk mahallesi sâkinelerinden Râziye bt. Ahmed Efendi tarafından zikri âtî husûsu ikrâra vekîl olup mezbûreyi ma‘rifet-i şer‘iyye ile ârifân olan hâlâ ihtisâb ağası zahrü’l-emâsil ve’l-a‘yân Mehmed Ağa b. Hamza Ağa ve Mehmed Efendi ibnüʼl-müderris şehâdetleriyle şer‘an vekâleti sâbite olan Mustafa Efendi b. Durak meclis-i şer‘-i kavîm-i lâzımü’t-ta‘zîmde müvekkile-i mezbûre Raziye’nin sadrî kebîr oğlu Mehmed Çelebi b. Ömer muvâcehesinde bi’l-vekâle ikrâr ve i‘tirâf edip müvekkile-i mezbûre Raziye Hâtun mahalle-i mezbûrede vâki‘ bir tarafı Şaban Odabaşı bahçesi ve bir tarafı mezbûr Mehmed Çelebi vakfı ve bir tarafı Mahmud Çelebi mutasarrıf olduğu vakıf menzil ve bir tarafı ba‘zan mezbûr Mehmed Çelebi vakfı ve ba‘zan tarîk-i âm ile mahdûd olup bir fevkānî oda ve bir sofayı ve tahtapûşu ve bir bâb tahtânî odayı ve bahçe ve bi’r-i mâyı müştemil mülk menzilini oğlu mezbûr Mehmed Çelebi’nin sulbî sagīr oğlu Mustafa ile sulbiye sagīre kızı Rukiyye’ye fâriğan ani’ş-şevâgil hibe-i sahîha ile hibe ve temlîk edip mezbûr Mehmed Çelebi dahi velâyeten sagīrân-ı mezbûrân için ittihâb ve kabz ve temellük eyledi. Fîmâ ba‘d menzil-i mezbûr merkūmânın mülk-i mevhûbudur dedikde vekîl-i mezbûrun ikrâr-ı meşrûhunu merkūm Mehmed Çelebi vicâhen ve şifâhen tasdîk ve tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Şevvâli’l-mükerrem li sene selâse ve seb‘în ve elf.
Şuhûdü’l-hâl: Es-Seyyid İbrahim Çelebi b. Mustafa, Hasan Çelebi el-Müezzin, Ali Bey b. Mehmed Ağa, el-Hâc İsmail b. el-Hâc Halil, el-Hâc Şaban b. İsmail, el-Hâc Hasan sarrâc, kuyumcu Ahmed Çelebi, Mehmed b. Şaban.
|