|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 233 Hüküm no: 215 Orijinal metin no: [19a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Râbia bt. Mehmed’in bozahânesinden Mustafa Çelebi’ye düşen iki hisseyi el-Hâc Muharrem b. Ali’ye devrettiği
Sulh Medîne-i Galata a‘mâlinden kasaba-i Kasımpaşa’da el-Hâc Ahmed mahallesinde sâkine olup mukaddemâ vefât eden Râbia bt. Mehmed nâm hâtunun verâseti zevc-i metrûkü el-Hâc Muharrem b. Ali’ye ve mezbûrun li ebeveyn kız karındaşı Fâtıma Hâtun’un sadrî kebîr oğlu Mustafa Çelebi ile sadriyye kızı Ayşe nâm hâtun münhasıra ve tashîh-i mes’eleleri altı sehimden olup sihâm-ı merkūmenin üç sehmi mezbûr el-Hâc Muharrem’e ve iki sehmi mezbûr Mustafa Çelebi’ye ve bir sehmi mezbûre Ayşe Hâtun’a isâbet eylediği şer‘an zâhir oldukdan sonra, mezbûr Mustafa Çelebi meclis-i şer‘-i hatîr-i lâzımü’t-tevkīrde zikri âtî bozahâneye vâzı‘u’l-yed olan mezbûr el-Hâc Muharrem mahzarında ikrâr ve takrîr-i kelâm edip mukaddemâ vefât eden merkūme Râbia Hâtun’un terekesinden olup kasaba-i mezbûrede Debbâğlar sokağında vâki‘ lede’l-ahâlî ma‘lûmü’l-hudûd olan mârrü’z-zikr bozahâneden iki sehim hissemi mezbûr el-Hâc Muharrem’den da‘vâ eylediğimde mezbûr dahi ol bozahâne Kasımpaşa vakfından olup müteveffât-ı merkūme Râbia Hâtun hâl-i sıhhatinde, ol bozahânenin hakk-ı tasarrufun mütevellîsi Abdullah Efendi izniyle kendiye meccânen ferâğ eylediğini iddi‘â eyledikde ben dahi inkâr etmekle beynimizde münâza‘ât-ı kesîre vâkı‘a olmuş idi el-hâletü hâzihî mezbûr el-Hâc Muharrem vesâtat-ı muslihîn ile da‘vâ-yı merkūmdan an inkâr benim ile mahalle-i merkūmede vâki‘ lede’l-ahâlî ma‘lûmü’l-hudûd bir bâb tahtânî odayı ve sofayı ve müşterek su kuyusunu müştemil on bin akçe kıymetli mülk menzili ile sekiz bin akçe üzerine sulh olup ben dahi ber minvâl-i muharrer sulhu kabûl ve bedel-i sulh olan menzil-i mezbûr ile sekiz bin akçeyi mezbûr el-Hâc Muharrem yedinden alıp kabz edip ol bozahâneye müte‘allika da‘vâdan mezbûr zimmetini ibrâ-i âm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min Şevvâli’l-mükerrem li sene selâse ve seb‘în ve elf.
Şuhûdü’l-hâl: Odabaşı Ali Beşe b. Abdullah, İbrahim Çelebi b. Ali er-Râcil, Ali Çelebi b. Ramazan, Ahmed Beşe b. Mustafa, Ahmed Çelebi b. Mustafa, Ahmed Çelebi b. Mahmud kethüdâ-yı muhzırân, Mehmed Çelebi b. Ali, Abdülkādir Efendi el-Kâtib, Şükrullah Bey el-Muhzır, çukadar Ali Beşe, Çorbacı Mustafa Beşe, Baba Resûl b. Rıdvan, Mustafa Çelebi b. İsâ el-Muhzır, Abdi Çelebi el-Muhzır, Mehmed b. Ramazan, Mustafa Çelebi el-Muhzır.
|