.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 234
Hüküm no: 216
Orijinal metin no: [19a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


İbrahim Çelebi b. Bayram’ın Kayazâde Mehmed Çavuş vakfına olan borcunu mütevellî Mustafa Efendi b. İbrahim’e teslimi

İkrâr-ı deyn Mahmiye-i İstanbul’da Kayazâde Mehmed Çavuş vakfına hâlâ mütevellî olan işbu bâ‘isü’l-kitâb Mustafa Efendi b. İbrahim mahfil-i kazâda, gönderci tâifesinden İbrahim Çelebi b. Bayram ile zevcesi Fâtıma bt. Osman muvâcehelerinde bi’t-tevliyye üzerlerine da‘vâ ve takrîr-i kelâm edip mezbûr İbrahim Çelebi zimmetinde vakf-ı mezbûr malından yüz kıt‘a riyâlî guruş olup meblağ-ı mezbûru merkūme Fâtıma tarafından emr [ve] kabûlü hâviye kefâlet-i sahîha-i şer‘iyye ile kefîl olmuş idi hâlâ meblağ-ı mezbûru merkūm İbrahim Çelebi’den bi’t-tevliyye taleb ederim suâl olunsun dedikde gıbbe’s-suâl merkūm İbrahim Çelebi cevâbında bi’l-vâki‘ [fi’l-vâki‘] vakf-ı mezbûr malından yüz dokuz riyâlî guruş mütevellî-i merkūma zimmetimde vâcibü’l-edâ ve lâzımü’l-kazâ deynim vardır deyû bi tav‘ihî ikrâr ve i‘tirâf etmeğin ikrâr[ı] mûcebince meblağ-ı mezbûr yüz kıt‘a riyâlî guruşu mütevellî-i merkūma edâ ve teslîm[e] merkūm İbrahim Çelebi’ye tenbîh birle mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Şevvâli’l-mükerrem li sene selâse ve seb‘în ve elf.


Şuhûdü’l-hâl: Abdi Çelebi b. Hüseyin, Şükrullah Çelebi b. Mustafa, Resûl b. Rıdvan, Mehmed b. Ramazan, Hızır b. Abdünnebî.