.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 239
Hüküm no: 224
Orijinal metin no: [20a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ayşe Kadın bt. Mehmed Efendi’nin menzilinin Havva Kadın bt. Mustafa’ya satıldığı

Mülknâme Mahmiye-i İstanbul’da mukaddemâ Arpa Emîni mahallesi sâkinelerinden olup hâlâ Muhtesib İskender mahallesi sükkânından olan Ayşe Kadın bt. Mehmed Efendi tarafından husûs-ı câi’z-zikre vekîl olup mezbûreyi ma‘rifet-i şer‘iyye ile ârifân Süleyman Halîfe b. Mustafa el-Müezzin ve Mehmed Efendi b. Yunus şehâdetleri ile şer‘an vekâleti sâbite olan Ali Çelebi b. Abdullah nâm kimesne meclis-i şer‘-i şerîf-i şâmihu’l-imâdda râfi‘atü’l-kitâb Havva Kadın bt. Mustafa tarafından tasdîk-ı âti’z-zikre vekîl olup mezbûreyi ârifân olan Ali Halîfe b. Mustafa ve Zülfikār b. Abdullah şehâdetleri ile şer‘an vekâleti sâbite olan Süleyman Beşe b. Hasan muvâcehesinde bi’l-vekâle ikrâr ve takrîr-i kelâm edip müvekkilem mezbûre Ayşe Kadın zikr olunan Arpa Emîni mahallesinde vâki‘ bir tarafı Sâime Hâtun mülkü ve bir tarafı el-Hâc Mustafa mülkü ve bir tarafdan ba‘zan Paşmakçızâde ve ba‘zan Ömer Beşe mülkleri ve bir tarafdan tarîk-i âm ile mahdûd olup iki bâb fevkānî odaları ve matbahı ve bir bâb tahtânî odayı ve odunluğu ve ayazma ve zât-ı eşcâr-ı müsmire ve gayr-ı müsmire [ve] cüneyneyi ve kenîfi müştemil mülk menzilini cemî‘ tevâbi‘ ve levâhıkı ve kâffe-i hukūk ve merâfıkı ile merkūme Havva Kadın’a elli yedi bin akçeye bey‘-i bâtt-ı sahîh-i şer‘î ile bey‘ ve teslîm edip ol dahi iştirâ ve tesellüm ve kabûl ettikden sonra meblağ-ı mezbûr elli yedi bin akçeyi merkūme Havva yedinden alıp kabz eyledi ba‘de’l-yevm menzil-i mezbûr cemî‘ tevâbi‘i ile mezbûre Havva’nın mülk-i müşterâsıdır keyfe mâ yeşâ’ ve yahtâr mutasarrıfe olsun dedikde vekîl-i mezbûrun ikrâr-ı meşrûhunu mezbûr Süleyman Beşe vicâhen ve şifâhen tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Şevvâli’l-mükerrem sene 1073.


Şuhûdü’l-hâl: Hasan Efendi b. Mahmud el-İmâm, Ali Halîfe b. Mustafa el-Müezzin, Bayram b. Sadi, Ahmed Çelebi b. Bâli, Ahmed Hoca Türbedâr, Ebûbekir b. Musa, Süleyman b. Hasan, el-Hâc Ahmed b. Mahmud.