.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 240
Hüküm no: 225
Orijinal metin no: [20a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


El-Hâc Mustafa b. Himmet’in mülkünü Râbia bt. el-Hâc Mustafa’ya sattığı

Mülknâme Dârü’l-hilâfeti’l-aliyye Kostantıniyye el-mahmiyye’de [Ke]çeci Pîrî mahallesi ahâlîsinden el-Hâc Mustafa b. Himmet nâm kimesne meclis-i şer‘-i hatîr-i lâzımü’t-tevkīrde hâfızatü’l-kitâb Râbia bt. el-Hâc Mustafa nâm hâtun mahzarında tav‘an ikrâr ve takrîr-i kelâm edip mahalle-i mezbûrede vâki‘ bir cânibi Suyolcu Mehmed mülküne ve bir cânibi imâm vakfına ve bir cânibi tarîk-i hâssa ve bir cânibi tarîk-i âma müntehî hâriciyye bir fevkānî selâmlık odasını ve ahırı ve kenîfi ve dâhiliyye bir bâb fevkānî oda ve bir bâb tahtânî oda ve bir kileri ve matbahı ve su kuyusunu ve kenîfi ve muhavvata-i yesîreyi müştemil mülk-i mezbûru Râbia Hâtun’a altmış bin fıddî râyic fi’l-vakt akçeye tarafeynden îcâb ve kabûlü hâvî bey‘-i kat‘î ile bey‘ ve teslîm ol dahi ber minvâl-i muharrer iştirâ ve tesellüm eyledikden sonra semeni olan meblağ-ı mezbûr altmış bin akçeyi mezbûre Râbia Hâtun yedinden bi’t-tamâm ve’l-kemâl alıp min ba‘d menzil-i mezkûr mezbûre Râbia Hâtun’un mülk-i müşterâsı olmuşdur keyfe mâ yeşâ’ ve yahtâr mutasarrıfe olsun dedikde mukırr-ı [mez]bûru mezbûre Râbia Hâtun kelimât-ı meşrûhasında vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min Şevvâli’l-mükerrem li sene selâse ve seb‘în ve elf.


Şuhûdü’l-hâl: Mehmed Efendi b. Yusuf el-İmâm, Mehmed Halîfe b. Mustafa el-Müezzin, Mehmed b. İsmail el-Kayyım, Hasan Halîfe b. İbrahim, El-Hâc İsmail b. Hüseyin, Ömer Efendi el-İmâm, Ahmed Çavuş, Mustafa Beşe b. Durak, Sâlih b. Mehmed, Ahmed Çelebi b. Ali Serbölük, İsâ Çelebi b. İbrahim, Abdi Çelebi el-Muhzır.