.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 241
Hüküm no: 227
Orijinal metin no: [20a-5]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Şeyh Yavsi zâviyesinin vekili Siyami Dede b. Veli’nin zâviyeye yeni kuyu açmak işini üç Ermeni’ye kiraladığı

İstîcâr Mahmiye-i İstanbul’da Sultan Bayezid Hân -aleyhi’r-rahmeti ve’l-gufrân- kutbü’l-ârifîn Şeyh Yavsi -kuddise sırruhü’l-azîz- hazretleri için binâ eyledikleri zâviyenin bi’l-fi‘l mütevellîsi olan iftihârü’l-meşâyih ve’l-mürşidîn eş-Şeyh Abdülbâkī Efendi b. eş-Şeyh Abdülmecid Efendi tarafından Mehmed Efendi b. Mustafa ve Şaban Efendi b. Musa şehâdetleri ile şer‘an vekâleti sâbite olan Siyami Dede b. Veli meclis-i şer‘-i hatîr-i lâzımü’t-tevkīrde tâife-i lağımcıyândan Matik v. Bahâdır ve Edil v. Megar ve Güldede v. Budak nâm Ermeniler muvâcehesinde bi’l-vekâle takrîr-i kelâm edip zâviye-i mezbûrede şeyh olanlara süknâsı meşrût olan menzilin içinde olan kuyu örülüp kābil-i intifâ‘ ve imâret olmamağla menzil-i merkūma bir kuyu hafr olunmak ehem ve elzem olmağın ol örülen kuyunun kurbunda ana mu‘âdil olup suyu zâhir olunca ağızlık ve bileziğinden mâ‘adâ bi’r-i mezbûrun öründüsüne harc ve sarf olunan ahcâr üzerlerine olmak vechi ile on altı kulaç bir kuyu hafrına merkūm Ermenileri dört bin beş yüz akçeye istîcâr edip meblağ-ı mezbûrdan bin akçesin yedlerine teslîm edip meblağ-ı bâkī üç bin beş yüz akçeleri elân zimmetimde[dir] dedikde merkūm Ermeniler dahi vekîl-i mezbûrun kelimât-ı muharreresini vicâhen tahkīk ve şifâhen tasdîk etmeğin vâki‘ü’l-hâl hıfzen li’l-makāl ketb ve imlâ olundu. Fi’l-yevmi’s-sâmin ve’l-ışrîn min Şevvâli’l-mükerrem sene 1073.


Şuhûdü’l-hâl: Musa De[de] b. İlyas, Mehmed b. Ramazan, Mustafa b. İsâ, Hacı Veli, Abdi Çelebi.