|
İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 241 Hüküm no: 226 Orijinal metin no: [20a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Eğin’in Behrâm mahallesinden Sefer isimli Ermeni’nin vârisleri ile Kirkor v. Hindi’nin alacak verecek davasından sulh oldukları
Sulh Fi’l-asl vilâyet-i Anadolu’da nefs-i kasaba-i Eğin mahallâtından Behrâm mahallesi sükkânından olup bundan akdem mahmiye-i İstanbul’da ekmekçi iken hâlik olan Sefer nâm Ermeni’nin verâseti, zevce-i metrûkesi Agike ile sulbî kebîr oğlu Markar’a ve sulbiye sagīre kızı Azer’e münhasıra olduğu şer‘an zâhir ve mezbûr Markar sagīre-i mezbûrenin vasîsi olduğu mütehakkik oldukdan sonra, mezbûr Markar kendi tarafından asâleten ve vesâyeten ve mezbûre Agike tarafından vekîl olup Serkis v. Rum ve Mıgırdiç v. Murad şehâdetleri ile şer‘an vekâleti sâbite oldukdan sonra vekâleten meclis-i şer‘-i hatîrde Kirkor v. Hindi mahzarında asâleten ve vekâleten ve vesâyeten ikrâr ve takrîr-i kelâm edip mûrisimiz müteveffâ-yı mezbûr hayâtında mezbûr Kirkor ile ekmekçiler san‘atında şerîkler olup mâl-ı şirketden merkūm Kirkor’da yirmi bin akçesi kalıp hâlik olmağla meblağ-ı mezbûru da‘vâ ettiğimde inkâr edip ben dahi isbâta kādir olmayıp yemîn etmesi mukarrer olup sagīr hakkında sulh enfa‘ olmağla da‘vâ-yı mezbûreden mezkûr Kirkor benimle beş bin akçe üzerine sulh olup ben dahi sulh-ı mezbûru kabûl ve bedel-i sulh olan meblağ-ı mezbûru yedinden kabz eyledim ba‘de’l-yevm husûs-ı mezbûra müte‘allika da‘vâ ve nizâ‘ım kalmadı dedikden sonra merkūm Kirkor dahi meclis-i mezbûrda takrîr-i kelâm edip hâlik-i merkūm hâl-i sıhhatinde Hacı Ali nâm kimesneden iktirâz eylediği iki yüz guruşa emri ile ben kefîl olmağla ba‘de helâkihî merkūm Hacı Ali benden kefâletime binâ’en meblağ-ı mezbûru ahz eyledi deyû da‘vâ etmiş idim. Ol da‘vâdan ve şirket-i mezbûre müte‘allika da‘vâdan verese-i merkūmunun zimmetlerini ibrâ-i âm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tesâdukı’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Şevvâli’l-mükerrem sene 1073.
Şuhûdü’l-hâl: Şaban Efendi b. Receb el-İmâm, Hâfız Osman Efendi b. Ömer el-Müezzin, Fazlı b. Mehmed, Mehmed b. Mustafa.
|