.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 243
Hüküm no: 229
Orijinal metin no: [20b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Sâbiha bt. İbrahim’in arsasını Rahime Hanım bt. Hasan Paşa’ya sattığı

Mülknâme-i arsa Mahmiye-i İstanbul’da Molla Aşkī mahallesinde sâkine Sâbiha bt. İbrahim nâm hâtun tarafından ikrâr-ı âti’z-zikre vekîl olup zâtını ma‘rifet-i şer‘iyye ile ârifân olan Mehmed Çelebi b. Sinan ve Ali Çelebi b. Mustafa nâm kimesneler şehâdetleriyle vekâleti sâbite olan li ebeveyn karındaşı Mehmed Çelebi b. İbrahim nâm kimesne meclis-i şer‘-i hatîrde hâfızatü’l-kitâb Rahime Hanım bt. Hasan Paşa mahzarında bi’l-vekâle ikrâr ve takrîr-i kelâm edip müvekkilem mezbûre Sâbiha mahmiye-i merkūmede Cerrâh Mehmed Paşa câmi‘i kurbunda el-Hâc Ahmed mahallesinde vâki‘ bir cânibi Çelgin Ahmed Bey mülküne ve bir cânibi Sâliha Hâtun mülküne ve bir tarafı tarîk-i hâssa ve bir cânibi tarîk-i âma müntehî üç mülk taş duvarı müştemil mülk arsa-i hâliyesini mezbûra Rahime Hanım’a doksan beş esedî guruşa bey‘-i kat‘î ile bey‘ ve teslîm ol dahi minvâl-i muharrer üzre iştirâ ve tesellüm eyledikden sonra semeni olan meblağ-ı mezbûr doksan beş esedî guruşu yedinden tamâmen alıp kabz eyledim min ba‘d arsa-i mezbûre Rahime Hanım’ın mülk-i müşterâsı olmuşdur keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Şevvâli’l-mükerrem sene 1073.


Şuhûdü’l-hâl: Seyyid Mehmed Çelebi, Mehmed Efendi b. Mustafa el-İmâm, Mahmud Halîfe b. Mustafa el-Müezzin, Yek-sereci Hacı Mehmed, Acemi Çorbacısı İvaz Ağa, Celeb Mehmed Bey el-Cündî Abdi Çelebi el-Muhzır.