.:: İstanbul Kadı Sicilleri ::.


İstanbul Mahkemesi 12 Numaralı Sicil (H. 1073-1074/M. 1663-1664)
cilt: 16, sayfa: 243
Hüküm no: 230
Orijinal metin no: [20b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ayşe Hâtun’un boşandığı Dilaver b. Abdullah’da kalan eşyalarının anası Fâtıma Hâtun’a verilmesi

Yemîn Mahmiye-i İstanbul’da Şeyh Muhyiddin mahallesinde sâkine olup mukaddemâ vefât eden Ayşe Hâtun’un verâseti zevc-i metrûkü Dilaver b. Abdullah’a ve vâlidesi Fâtıma nâm hâtuna ve sadriyye sagīre kızı Râbia’ya münhasıra olup mezbûre Fâtıma Hâtun meclis-i şer‘de mezbûr Dilaver mahzarında üzerine da‘vâ edip mukaddemâ kızım müteveffât-ı mezbûreyi mezbûr Dilaver tezevvüc eyledikde ben evsât-ı nâsdan olmağla mezbûre[ye] üç beledî döşek ve üç beledî minder altı basma yastık ve otuz miskāl altın bileziğimi âriyet vermiş idim hâlâ mezbûre vefât edip ol eşyâ mezbûr Dilaver yedinde mevcûd olmağla taleb ederim, mezbûrdan suâl olunsun dedikde gıbbe’s-suâl mezbûr Dilaver dahi cevâbında fi’l-vâki‘ mezbûre Fâtıma Hâtun evsât-ı nâsdan olup kızı mezbûreyi tezevvüc eylediğimde yedimde mevcûd olan eşyâ-i mezkûreyi kızı mezbûreye hibe ve teslîm edip fevtinden sonra kendi rub‘ hisseme ta‘yîn olunmağla zabt ederim deyû iddi‘â eylediğinde, gıbbe’l-istintâk ve’l-inkâr mezbûrândan müdde‘âları için beyyine taleb olundukda her biri ityân-ı beyyineye kādir olmayıcak, mezbûre Fâtıma Hâtun’un şeyh-i meşâyihu’l-İslâm hazretlerinden yedinde olan fetvâ-yı şerîfesine nazar olundukda “evsât-ı nâsdan olan Hind kızı Zeyneb’i Zeyd’e tezevvüc eyledikde cihâz nâmına Zeyneb’e bir mikdâr emti‘a ve esvâb verip ba‘dehû Zeyneb fevt olup zevci Zeyd ile anası Hind’i terk ettikde Hind ol emti‘a ve esvâbı âriyet vermiş idim deyû da‘vâ ve Zeyd hibe etmişdin deyip tarafeynin müdde‘âlarına beyyineleri olmayıcak Hind ol emti‘a ve esvâbı yemîni ile almağa kādir olur mu deyû suâl olundukda cevâb-ı bâ savâblarından olur buyurulmağın” fetvâ-yı şerîfe mûcebince ol eşyâyı âriyet verip ve mezbûreye hibe ve temlîk eylediğine yemîn teklîf olundukda mezbûre Fâtıma’ya alâ vefki’l-mes’ûl yemîn billâh etmeğin aynıları mevcûd olmağla zikr olunan eşyâyı mezbûreye red ve teslîme mezbûr Dilaver’e tenbîh birle mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Şevvâli’l-mükerrem li sene selâse ve seb‘în ve elf.


Şuhûdü’l-hâl: Hüseyin Efendi el-Brusî kâtibü’l-vesîka, Abdünnebî Ağa, Mehmed Ağa b. Mahmud kethüdâyi’l-muhzırân, Mehmed Ağa b. Mahmud sermuhzırân, çukadar Ali Beşe